Uummannami imeq imigassaq uuliamik annikitsunnguarmik nasssaarfigineqartoq - Imerneqarsinnaavorli

Ulloq 11. decembari 2020 Uummannami misissuinerit inernerisa nutaat, 21. decembari 2020-mi Ilisimatusarnermut Avatangiisinullu Naalakkersuisoqarfimmit pissarsiarineqartut takutippaat, erngup aqqutaani sumiiffit ilaanni imeq annikitsunnguamik uuliamik akoqartoq. Imeq imeqarfimmeersoq imerneqarsinnaavoq.

Ilisimatusarnermut Avatangiisinullu Naalakkersuisoqarfiup Kalaallit Nunaanni Nakorsaaneq isumasioqatigereerlugu nalilerpaa tamanna peqqissutsimut ajoqutaanngitsoq, Uummannamilu imeq suli imerneqarsinnaasoq.

 

Ulloq 11. december 2020 imermik pilersuineq akornuteqalerpoq , taamaattumillu piffissami sivikitsumi qaminneqarluni. Erngup aqqutaa imermik immerneqaqqimmat, ruujorit qalippernerinit uuliamineq kaanngarluni imermik pilersuinermut aqqusersuutit ilaannut siaruaappoq. Uulia pineqartoq 2019-imi septembarimi kukkusoqarnerani uuliap illoqarfiup ernganut imigassamut akuliunneqartup assingaa. 

 

Misissugasat ullormi ingerlatsinermik unittoorfiusumi tiguneqartut uuliamik akoqartut paasineqarpoq. Tamatuma kingorna Nukissiorfinnit erngup aqqutaa biilillu imertaassuit salinniarlugit imeq kuutsinneqaqattaarpoq, naatsorsuutigineqarporlu imeq uuliamik akoqarunnaarsimassasoq. Inuinnaat imiisivii tankit aamma erngup aqqutaa Nukissiorfinnit imermik kuutsitsivigineqaqattaarlutik salinneqarput. Allanik iliuuseqartoqartariaqarnera naatsorsuutigineqanngilaq. Ilisimatusarnermut Avatangiisinullu Naalakkersuisoqarfiup pisut malinnaaffigai, erngullu pitsaassusia misissorneqallattaassaaq.

Paasisaqarnerorusukkuit saaffigiuk:

Ilisimatusarnermut Avatangiisinullu Naalakkersuisoqarfimmi Immikkoortortami pisortaq Karen Anne Arleth, tlf.: 345465 imaluunniit email: knar@nanoq.gl