Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaat allanngortinneqarpoq

Naalakkersuisut ullormi 17. december 2020 ataatsimiinnerminni maleruagassat ullutsinnut naleqqunnerusut aamma innuttaasunut oqartussanullu paasiuminarnerusut pilersinniarlugit Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaat nr. 8, 8. april 2016-imeersoq allannguiffiginiarlugu aalajangersimapput. Nalunaarutit arlallit kukkunersiorneqarnissaannut aamma ingerlatsivimmi paasiuminarnerusoqarnissaanut ukkataqarnerunissamut atatillugu nalunaarummik allannguineq inatsisitigut teknikimut tunnganeruvoq.

Nalunaarummi ilaatigut pisassiissutinik nuussisinnaanermut aaqqissuussineq aqqutigalugu pisassiissutinik nuussat tuniniarneqarsinnaanerannut erseqqilluartumik inerteqquteqartitsineq eqqunneqarpoq, qinnuteqaatinullu immersuiffissat atortarnissaannut erseqqissumik piumasaqartoqalerpoq aamma nittartakkamut nutaamut innersuussuteqartoqarluni.

APNN-imi suleqatigiissitap pilersinneqartup qanoq iliorluni sinerissap qanittuani qaleralinniarnermi pisissiissutit atorneqarsimanngitsut sinerissap qanittuani aalisartunut agguaanneqaqqissinnaanerinut aaqqiissutissanut siunnersuutissamik nassaarniarnissaq suliassarilersimavaa, taamaaliornikkut TAC-ip ukiup qaammataani kingullerni qaffaaffiginissaa pinngitsoortinneqassammat.

Aaqqiissutissatut siunnersuut suleqatigiissitap saqqummiussaa, Naalakkersuisullu akuersissutigisimasaat tassaavoq § 7, imm. 5-imik nutaamik imatut oqaasertalimmik ikkussisoqassasoq:

”Imm. 5. Imm. 2 naapertorlugu 1. julip kingorna qaleralinnut ukiumoortumik pisassiissutigineqartuni nuunneqartunik aalisarneqarsimanngitsunik peqartoqarsimappat Naalakkersuisut ukiumoortumik pisassiissutit taakkua imartami 47-mi sinerissap qanittuani aalisariutit akornanni agguaaqqissinnaapput."

Pisassiissutinillu nuussisinnaanermut tunngatillugu:

§ 7. Raajarniarnermi qaleralinniarnermilu aalisariutaatileqatigiiffik ukiumoortumik pisassiissutinik tamakkerlugit aalisarsimasoq qinnuteqartoqarneratigut 15. novembarip kingornatigut ukiumi pineqartumi aalisarnermik ingerlatitseqqinnissaminut akuerineqarsinnaavoq. Ukiumoortumik pisassiissutit saniatigut pisarineqartut annertussusii ukiup tulliani aalisariutaatileqatigiiffimmut ukiumoortumik pisassiissutigineqartunit ilanngaatigineqassapput.
Imm. 2. Raajarniarnermi qaleralinniarnermilu aalisariutaatileqatigiiffiup ukiumoortumik pisassiissutinik tamakkerlugit aalisarsimanngitsup qinnuteqartoqarneratigut ukiup siuliani pisarineqanngitsut amerlaqataannik ukiup tulliani ukiumoortumik pisassiissutit amerlineqarnissaannik akuerineqarsinnaavoq. Raajarniarnermi pisassiissutit nuunneqartut kingusinnerpaamik 30. april pisarineqarsimassapput qaleralinniarnermilu kingusinnerpaamik 1. juli pisarineqarsimassapput.
Imm. 3. Qinnuteqaat imm. 1 malillugu aalisarnerup nangeqqinnissaanut kissaatigineqartoq sioqqullugu sapaatip akunneri marluk qaangiutsinnagit Aalisarnermut, Piniarnermut Nunalerinermullu Naalakkersuisoqarfimmut nassiunneqassaaq, aalisakkallu aalisarusunneqartut amerlassusaannik imaqassalluni.
Imm. 4. Imm. 1-2 naapertorlugit ukiumoortumik pisassiissutit nuunneqartut aalisariutaatileqatigiiffimmiit aalisartumiilluunniit ukiumoortumik pisassiissutinik nuussiffigineqartumiit aalisarneqassapput.
Imm. 5. Imm. 2 naapertorlugu 1. juli kingorna qaleralinnut ukiumoortumik pisassiissutini nuunneqartuni aalisarneqartunik sinneqarsimappat ukiumoortumik pisassiissutit taakkua sinerissap qanittuani imartami 47-mi aalisariutit ilaannut marluusunut Naalakkersuisut agguaaqqissinnaapput.

Imm. 5-imi allannguineq sinerissap qanittuani qaleralinnik aalisartunut pingaaruteqarpoq. Taamaalilluni ukiut tamaasa 1. juli kingorna qalerallit 4.000 tonsit sinnerlugit sinerissap qanittuani aalisariutinit anginerusunit aqutsiveqarfinni Upernavimmi, Uummannami kiisalu Qeqertarsuup Tunuani aalisarneqanngitsoortarput, taakkulu umiatsiaaqqanut, taakkua ukiup naannginnerani pisassatik aalisarsimappatigik, massakkut nuunneqarsinnaalissapput.

Attavissaq:
Immikkoortortaqarfimmi pisortaq Emanuel Rosing,
Aalisarnermut, Piniarnermut Nunalerinermullu Naalakkersuisoqarfik
E-mail: emro@nanoq.gl