Qaanaami inuusuttunut inissianik sanaartornissaq

Naalakkersuisut Aningaasaqarnermut Akileraartarnermullu Ataatsimiititaliaq peqatigalugu Qaanaami inuusuttunut inissianik arfinilinnik sananissamut aningaasaliinissamut siumoortumik akuersissuteqareerlutik, maanna akuersipput.

Qaanaami inuusuttunut ineqarnikkut pissutsit annertuumik ajornakusoornerinut nassueruteqarneq sanaartornissamut tunngavigineqarpoq. Amerlanertigut kinguaariit arlallit illuni minnerusuni najugaqatigiittarput. Illoqarfimmi inissianik nutarterisoqarpiartannginnera, taamatullu nutaanik sanaartornerit annertusineqartannginnerat peqqutaallutik unammilligassat sakkortunerulertarput. Inuusuttut amerlasuut  illoqarfimminni najukkaminni najugaqaannarnissartik kissaatigisarpaat, aammalu inuusuttunut taakkununnga inissianik amigaateqartoqartoq takuneqarsinnaavoq. Inuusuttunut inissiat arfinillit aallartinneqarnissaannut akuersissuteqarnikkut inuusuttut taakku Qaanaami najugaqaannarnissaat taperserneqarpoq.

Inuusuttunut inissianik nutaanik sanaartornermi inuusuttunut inissianut malitassaq nutaaq, suli ineriartortinneqartoq tunngavigineqassaaq. Suliami najugaqarfinni minnerni sanaartornissaq, aammalu nassiussinermi, tikisitsinermi, atortussanik passussinermi, piffissami sanaartorfiusussami il.il. pissutsit immikkut ittuuneri eqqarsaatigineqassapput. Suliami tassani illut aamma najugaqartunik sulisoqarluni sanaartorneqarnissaat anguniagaavoq.

Inuusuttunut inissiat arfinillit, aalajangersimasunik illuliornermi malitassat malillugit sananeqartussat siullersaraat, taamaattumillu suliatut misiligutitut isigineqassaaq, tamatuma kingorna nuna tamakkerlugu najugaqarfinni minnerni malitassatut atorneqassalluni. Suliaq aningaasalersuisarnermi aaqqissuussinernut, sanaqateqarluni illuliornermut aaqqissuussinermi, inissianik aningaasalersuisarnermi aaqqissuussinermi kiisalu piginneqatigiilluni inissiaatit pillugit aaqqissuussinermi pioreersuni atuutereersunut ilaatinneqarsinnaavoq.

Illuliassap nunatsinni inuusuttunut, najugaqarfinni minnerusuni najugaqartunut sapinngisamik pilerinartuunissaa qulakkeerniarlugu, sanaartugassaq igaffeqariissaaq uffarfeqariissallunilu nalinginnaasunik imaqarnermi saniatigut inissianut minnernut pisattanik nalinginnaasunik, soorlu siniffimmik, nalaasaarfimmik, nerrivimmik il.il. imaqassaaq.

Piffissamut pilersaarut malillugu inissiat nutaat 2022-mi ukiup affaata aappaani iserterfigeriaannanngorlutik piariissapput.

Inussiarnersumik inuulluaqqusillunga

Karl Frederik Danielsen

Ineqarnermut Attaveqaqatigiinnermullu Naalakkersuisoq

Qaanaami inuusuttunut inissianik sanaartornissaq