Aqutsiveqarfinni Qaanaami Ittoqqortoormiinilu amaqqunik naleqqussaaneq

Naalakkersuisut aalajangerput aqutsiveqarfinni Qaanaami aamma Ittoqqortoormiini amaqqut amerlassusaannik naleqqussaaniarnermi pisassiissutinik amerlanerpaaffilerneqassanngitsut. Tamanna imatut paasineqassaaq, inuussutissarsiutigalugu piniartut atuuttumik piniarnermut allagartallit tuttunniartillutik, umimmanniartillutik piniakkanillu allanik neqissaqarniarnermut pingaarutilinnik piniariartillutik amaqqunik naammattuuigunik pisarisinnaagaat. Amaqqut ukiumut pisarineqarsinnaasut amerlanerpaaffilerneqanngillat.

Inuussutissarsiutigalugu piniartut amaqqunik naleqqussaanissamut periarfissinneqarnissaat siunertarineqarpoq taamaaliornikkullu amaqqut piniakkanik, soorlu tuttunik, umimmannik aamma piniakkanik allanik, aqutsiveqarfinni Qaanaami aamma Ittoqqortoormiini neqissaqarniarnermut pingaaruteqarluinnartunik akornusiinerisa minnerpaaffinngortinnissaat. Amaqqunik pisaqarnermi immersugassaq atorlugu pisamik nalunaaruteqarnissaq kommunimut tunniussinikkut inatsimmi piumasaqaataavoq soorluttaaq amaqqup ilaanik umassusililerinermik misissuinermut atugassanik tunniussisoqassasoq.

Nalunaarummi allatut ajornartumik iliortariaqarneq imaluunniit imminut illersortariaqarneq pillugu aalajangersagaqarpoq. Aalajangersagaq pineqartoq malillugu amaqqut inoqarfiit eqqaannut – tassa illoqarfiup imaluunniit nunaqarfiup killeqarfiannut 500 meterinik qaninnerusumik - imaluunniit inoqarfinnut pisut toqunneqarnissaat periarfissaavoq. Tamanna pillugu APNN maleruagassanik suliaqarpoq taakkulu susassaqartunut tusarniaassutigineqassapput.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl