Ilinniartitaanermut, Kultureqarnermut, Ilageeqarnermullu Naalakkersuisoq Katti Frederiksenip Ullukinnermi pilluaqqussutaa, 21. December 2020

Nunaqqatinnut

Ullumikkut ulloq tassaavoq Ullukinneq. Ullukinneq tassaavortaaq ukiup taarnerpaaffiani ulloq kingulleq. Inatsisartut novembarip 28-ni 2018-imi aalajangerpaat Ullukinneq pisortatigut nalliussineqartassasoq. Taamaasilluni pisortatigut Ullukinnersiortarnissaq naqissuserneqarpoq. Tamanna nuannaarutigalugu tulluusimaarutigalugu Naalakkersuisut sinnerlugit Ullukinnermi tamassi pilluaqqujumavassi.

Ullukinneq tassaavoq qanga siulitta issittormiuusut nalliuttorsiorfigisartagaat pingaaruteqarluinnartoq. Assigiinngitsunik ileqqoqartarsimapput, soorlu ilaatigut nutaanik atisartaarlutik kamittaarlutillu, aammalu nutaanik piniutitaarlutik imminnut pilersortuugamik. Aasap ukiallu ingerlanerani nerisassanik pilisarput ilaatigut aamma Ullukinnersiornermi sassaalliutissanik. Qilaatersortoqartarpoq, oqaluttuatoqqallu oqaluttuarineqartarlutik.

Ullorissat aassuutit Ullukinnermut malunnaataapput qitiulluinnartut. Allaaserineqartut ilagaat aassuutit seqineq kiviartortoq ataaniit ungoorlugu qummut aallartittarsimagaat silarsuaq qaammariartuleqqinniassammat. Ullut aggersut qaammariartuinnalissapput, tamannalu ersiutaavoq suna tamarmi nutaanngoqqilerneratut ittoq.

Naak qangarsuaaniilli Ullukinnersiorneq siulitsinnit nalliussineqartaraluartoq Kristumiunngornitsinni ileqqoq puigorneqariartortutut ilersimagaluarpoq, nuannerporli ukiuni arlaqartuni kingullerni sumiiffinni assigiinngitsuni uummarissaqqillugu nalliussineqartalermat. Kulturikkut pikialaartitsinerit ingerlanneqartarput.

Ilaasa qujamasuffittut, ilaqutserinermut, kalaaliminertornermullu atortarpaat. Kommunit kulturikkullu illorsuit sumiiffinni assigiinngitsuni aaqqissuussisarput, soorlu aamma ulloq taanna atorluarlugu Ullukinneq aassuutillu oqaluttuassartai oqaluttuarineqartarlutik.

Ullukinneq kalaaliussutsitsinnut ilisarnaatitta pingaarutillit ilagaat.

Ullukinnersiorluarnissassinnik tamassi kissaappassi, neriuppungalu ulloq atorluarumaarissi. Tamassi juullimi ukiortaassamilu pilluaritsi.