Namminersorlutik Oqartussat inissiarsuaataanni atortunik nutarterinissaq

Naalakkersuisut aamma Aningaasaqarnermut Akileraartarnermullu Ataatsimiititaliap Namminersorlutik Oqartussat inissiarsuaataanni atortunik nutarterinissamut aningaasaliinissaq akuersissutigeqqammerpaat.
Namminersorlutik Oqartussat inissiaataat amerlasuut aserfallatsaaliuinermi kinguaattoorfiullutik pisariaqartitsiviupput, illut atortuini arlalinni piffissaq atuuffissami atorunnaarnissamut killiliussaq nallersimallugu. Illut illullu atortuisa aserfallakkiartornerinut nalinginnaasumut atatillugu ulorianartorsiorfiusut annersaat ataasiuvoq, tassalu imeq. Imermut atortut kuuffiillu ajoquserpata, tamatuma kingunerisaanik ajoqusertoqarnissaa annertuumik ulorianartorsiorfiussaaq, taamaalillunilu ajornerpaamik pisoqassappat inissiat aammalu inissiarsuit tamarmiusut piffissami sivikinnerusumi sivisunerusumiluunniit najugaqarfigineqarsinnaajunnaassapput.
Taamaattumik tamanna nassuerutigalugu inissiarsuarni, ajoqusernissamut immikkut ilimanaateqartutut naliliiffigineqartuni imermut kuuffinnullu atortut nutarterneqarnissaannut aningaasanik immikkoortitsisoqarpoq. Suliniut taanna Namminersorlutik Oqartussat inissiaataanni kuuffiit unerarfiinik kuuffinnillu nutarterinermi iliuusissanut pilersaarummut tamarmiusumut ilaasutut isigineqassaaq. Immikkoortumi siullermi inoqutigiit 1000-ingajaat, suliniummut matumunnga ilaatinneqartussat pineqarput.
Inissiat toqqartukkat kuuffeqarfiinik nutarterinissamut peqatigitillugu illut ukiut sananeqarfii aallaavigalugit, illuni arlalinni, atortut atasinnaassusiini sinneruttuni ukiunik tallimaniit qulinut missiliorneqartuni kuuffiit unerarfiinik kuuffiinillu misissuinernik aallartitsisoqassaaq. Kiisalu iliuusissanut pilersaarusiami matumani pisariaqartitsiviusuni imermut atortunik taarsersuisoqassaaq.
Iliuusissanut pilersaarummi nutarterinerit tamarmik ataatsikkut suliarineqannginnissaat, akerlianilli VVS-ilerinermi ingerlaavartumik suliniuteqartoqarsinnaanissaa eqqarsaatigineqarpoq. Najukkani iluarsaassinernik aallartitsinissamut periarfissat apeqqutaatillugit, inissiani toqqartorneqartuni suliaqarnerit 2022-p naanissaata tungaanut ingerlassapput.
Taarsersuinermi Nuummi misiligummik suliaq, kuuffiit unerarfiinik igaffinnilu kuuffinnik, periaaseq ’ruujorip iluani ruujori’ atorlugu iluisigut qalliinernik iluatsilluartumik suliaqarneq malinneqassaaq. Suleriaaseq atorlugu ruujori pioreersoq iluatigut ruujorilerneqassaaq, taamaalillunilu atasinnaassusia sivikinnerpaamik ukiunik 20-nik, aammalu ukiut 40-t tikillugit sivitsorneassaaq. Suleriaatsip taassuma inissiani najugaqarfiusuni suliarineqarsinnaanera iluaqutissartaraa, taamaalillunilu najugaqartunut persaqusersuineq annikippoq, tamatumalu peqatigisaanik aningaasartuutit ikinnerpaatinneqarsinnaapput. Nuummi misiligummik suliaq Islandimi entreprenøri, ukiorpassuarni misilittagaqarsimasoq, aammalu suleriaatsimik taassuminnga immikkut ittumik ilisimasalik suleqatigineqarpoq.
Iluarsaassinissamut atortussat Namminersorlutik Oqartussanit pisiarineqassapput aammalu najukkani entreprenørinut atugassiissutigineqassallutik, taamaalillunilu sanasut ataasiakkaat suliassanut neqerooruteqarnissamut atortussanik akisuunik pisinissaat pisariaqassanngilaq. Najukkani sanasut ilinniartinneqassapput teknikkimullu tunngasunik ikiorneqartussaallutik.

Inussiarnersumik inuulluaqqusillunga

Karl Frederik Danielsen
Ineqarnermut Attaveqaqatigiinnermullu Naalakkersuisoq

Annertunerusumik paasisaqarusunnermi Ineqarnermut Attaveqaqatigiinnermullu Naalakkersuisoqarfik attaveqarfigineqassaaq, uunga: box909@nanoq.gl.