Tunumi sinerissap qanittuani aalisartut pitsaanerusumik atugassaqartinneqalerput

Tunumi aalisarneq ingerlalluarpoq aammalu nunap immikkoortuani aalisakkerivituaasup Arctic Prime Fisheriep Kuummiuni aalisakkerivia, aalisakkerivimmi qerititsivimmi inissat annertusinissaannut piareersimasimavoq. Taamaattoq aningaasaliinissaq kinguartinneqarsimavoq, pilersaarutaasuniit akisunerusoq paasinarsisimanera pissutigalugu, tassami aalisakkeriviup sarfalersorneqarnerata annertusitinneqarnissaa pisariaqarmat.

Taamaattumik Kuummiuni inissisimanerup iluarsiivigineqarnissaa aammalu aalisarnermik inuussutissarsiornerup najukkamilu inuussutissarsiortut ineriartortinneqarnerannut nukittorsaanissaq siunertaralugu kattuffinnit arlalippassuarnit qinnuteqaat Naalakkersuisut 2020-imi novembarip naalernerani tiguaat. Tamanna tunngavigalugu Naalakkersuisut Kuummiuni aalisakkerivimmut nutaanik innaallagissamut kabelilersuinissamut 1 million koruuninik aningaasaliissuteqarput.

Nunanut Allanut Nukissiuuteqarnermullu Naalakkersuisoq, Steen Lynge oqarpoq: Innaallagiamik imermillu pilersuinitta Kalaallit Nunaat tamakkerlugu inuussutissarsiortut ineriartornerannut tapersersuinissaa qulakkiissavarput. Naalakkersuisut Tunumi aalisarnermik inuussutissarsiortunut sukkasuumik aaqqiissutissanut aningaasassanik nassaarsinnaallutik, aaqqissuussisinnaagatta naammagisimaartorujussuuara

Aningaasanut inatsimmi aningaasat, pingaartumik Tunumi aalisarnerup ineriartortinneqarnissaata qulakkeerneqarnissaa siunertaralugu, aalisarnerup piniarnerullu nukittorsarneqarnissaanut immikkoortitaapput.

Aalisarnermut, Piniarnermut Nunalerinermullu Naalakkersuisoq, Jens Immanuelsen oqarpoq: Kalaallit Nunaanni aalisarnermik inuussutissarsiortut pitsaanerpaanik atugaqarnissaat qulakkeerniarlugu Naalakkersuisut ingerlaavartumik sulissutiginnipput. Tassunga atatillugu najukkami tunitsiveqarneq aammalu innuttaasunut suliffissanik qulakkeerinissaq ukkataraarput. Tunumi aalisarnermik inuussutissarsiuteqarnerup ineriartortinneqarnissaa immikkut ukkatarigatsigu isertugaanngilaq, taamaattumillu nunaqarfimmiit ataatsimoorluni suliniuteqarneq qinnuteqaateqarnerlu qujaruttorujussuuara.

Arctic Prime Fisheries Kuummiuni aalisakkerivia pingaartumik saarullinnik qaleralinnillu tunitsiviuvoq aammalu ukiut marlussuit kingulliit ingerlaneranni malunnaatilimmik amerleriartoqartoq misigineqarluni.

Nunanut Allanut Nukissiuteqarnermullu Naalakkersuisoqarfik
Paasissutissanik annertunerusunik piniarnermi attavigineqassaaq Immikkoortortaqarfimmi pisortaq Rasmus Wendt, oqarasuaat angallattagaq 557212