Ukiuunerani 2021-mi tuttunniarnissamut aamma umimmanniarnissamut piffissaliussat pisassiissutillu

Matumuuna ukiuunerani 2021-imi tuttunniarnissamut umimmanniarnissamullu piffissaliussat, tuttutassiissutit kiisalu umimmattassiissutit aalajangerneqartut nalunaarutigineqarput.

 

Ukiuni kingullerni Pinngortitaleriffimmiit Piniarfik 2-mi (Sisimiut-Kangerlussuaq)  martsimi  2018-imi pisortatigoortumik qulimiguulimmik tuttunik aamma umimmannik kisitsisoqarnikuuvoq, taamatullu Piniarfik 3-mi (Akia- Maniitsoq) aamma Piniarfik 4-mi (Ameralik) martsimi 2019-imi pisortatigoortumik qulimiguulimmik tuttunik kisitsisoqarnikuulluni. Kisitsinermiit pisortatigoortumik nalunaarusiat Pinngortitaleriffimmit suliarineqarput ilaatigulli immikkut ilisimasalimmik pisariaqartitsineq pissutigalugu maannakkut aatsaat naammassiniarneqarlutik.

 

Tuttut

1.       Aqutsiveqarfik Qaanaaq: Nuna Inglefield-imi aamma Prudhoe-mi ukiuunerani 2021-mi inuussutissarsiutigalugu aamma sunngiffimmi tuttunniarneq 1. januaarimiit 30. april ilanngullugu ingerlassaaq tassanilu aasaanerani ukiaaneranilu 2020-miit tuttutassiissutit sinneruttut pineqarlutik. Kangerluarsorujuk-mi tuttut kumallit ukiuunerani killeqanngitsumik piniarneqassapput.

 

Tunngavilersuutit: Aasaanerani aamma ukiaanerani 2020-mi Piniarfimmi 2-mi (Sisimiut-Kangerlussuaq), Piniarfik 3-mi (Akia-Maniitsoq), Piniarfik 4-mi (Ameralik) aamma Piniarfik 5-imi (Qeqertarsuatsiaat) qaammatini tallimani killeqanngitsumik inuussutissarsiutigalugu tuttunniartoqarpoq. Piniarfinni pineqartuni Pinngortitaleriffik naapertoglugu tuttut amerlavallaalersimanerat tassani tunngaviuvoq. Piniarnermut Naalakkersuisoq aalajangerpoq ukiuunerani killilimmik inuussutissarsiutigalugu tuttunniarneq ukiuni siuliini ingerlanneqartarnikuusoq Biologit inassuteqaataat malillugu unitsinneqassasoq.

 

APNN-ip kommunit qanimut suleqatigalugit akuersissutinik utertitsisarneq malinnaaffigivaa, utertinneqartannginnerat taamatullu pisanik nalunaaruteqartannginneq piniartunut ataasiakkaanut akuersissutinik qinnuteqarsinnaanissamut ukiuni aggersuni kinguneqassaaq.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat tuttunik ungoorinermi, malersuinermi piniarnermilu atornissaat inerteqqutaasoq assartuutillu motoorillit tuttunut minnerpaamik 500 meterinik ungasissuseqassasut.

 

Umimmaat

2.       Aqutsiveqarfik Maniitsoq: Piniarfik 1-imi, Piniarfik 2-mi, Piniarfik 3-mi aamma Piniarfik 4-mi  - Ilanngussaq 4 takuuk - ukiuunerani killilimmik umimmanniarneq 25. januaarimi 2021-mi aallartissaaq 23. februaari ilanngullugu ingerlassalluni tiggaat aamma kulavaat norrallit piniaqqusaanatik. Piniarfik 1-imi 75-nik umimmattassiisoqarpoq, Piniarfik 2-mi 225-nik umimmattassiisoqarpoq, Piniarfik 3–mi aamma Piniarfik 4-mi ataatsimut katillugit 750-nik umimmattassiisoqarluni. Piniarfik 2-mi, Piniarfik 3-mi aamma Piniarfik 4-mi umimmaat assartuutinit motorlinnit akornusersorneqarnerat pissutigalugu piffissaliussanut ullunik qulinik sivisussusilikkaanut umimmattassiisoqarpoq – Ilanngussaq 1 takuuk -  tamannalu Biologit ukiuni kingullerni oqariartuutaannut naapertuulluarpoq. Piniartut makitaasut piniarfimmi piffissaliussamilu ataasiinnarmi pisassinneqarnissaat tassani siunertaavoq. Sunngiffimmi piniartut assartuutinik motoorilinnik atuinissamut Piniarfik 3-ip ilaani APNN aamma Qeqqata Kommunia isumaqatigiissutaat malillugu periarfissinneqarput

3.       Aqutsiveqarfik Sisimiut: Ukiuunerani umimmanniarfimmik piniarfimmik nutaamik Piniarfik 5-mik taaguutilimmik pilersitsoqarpoq – Ilanngussaq 5 takuuk. Piniarfik 5-mi ukiuunerani umimmanniarneq 25. januaarimiit 2021-mi 23. februaari ilanngullugu ingerlassaaq tassanilu 150-nik umimmattassiisoqarpoq piffissaliussanut ullunik qulinik sivisussusilikkaanut agguataarneqartunik. Qeqqata Kommuniata Piniarfik 5-mut motoorilinnik assartuinissamut aqqutissiassamut aalajangiinera malinneqassaaq.

4.       Umimmaqarfik Naternaq: Ukiuunerani umimmanniartoqassanngilaq.

5.       Umimmaqarfik Ivittuut: Ukiuunerani umimmanniartoqassanngilaq.

6.       Umimmaqarfik Sigguk: Ukiuunerani umimmanniartoqassanngilaq.

7.       Aqutsiveqarfik Ittoqqortoormiit: Ukiuunerani 2021-mi inuussutissarsiutigalugu aamma sunngiffimmi umimmanniarneq martsi naallugu ingerlassaaq aqutsiveqarfimmilu umimmattassiissutit 60-iullutik.

8.       Aqutsiveqarfik Qaanaaq: Nuna Inglefield-imi, Nuna Prudhoe-mi aamma Qooqqunni ukiuunerani 2021-mi inuussutissarsiutigalugu aamma sunngiffimmi umimmanniarneq 1. januaarimiit 15. april ilanngullugu ingerlassaaq tassanilu aasaanerani aamma ukiaanerani 2020-miit umimmattassiissutit sinneruttut pineqarlutik.

9.       Umimmaat allat Nanortalimmut nuunneqarsimasut aamma Nuup Kangerluanut ingerlaarnikut eqqissisimatitaalluinnarput.

         

Tunngavilersuutit: Aqutsiveqarfik Ivittuuni: Ukiuni kingullerni umimmannik minnerpaaffiliinikkut kisitsisoqartarnera tunngavigalugu ukiuunerani 2021-mi umimmanniartoqassanngilaq. Ivittuuni umimmaat maannakkut amerlavallaarunnaarnerat tunngavigineqarpoq.

 

Aqutsiveqarfik Sisimiut-ni: Martsimi 2018-mi kisitsinermi paasineqarpoq aqutsiveqarfimmi umimmaat 2.600-it missaanniittut taakkunanngalu amerlanerit Sermersuup killinganiit kimmut 60 kilometerit angullugit inissisimasuullutik. Tamanna tunngavigalugu piniarfimmik nutaamik pilersitsisoqarpoq – Ilanngussaq 5 takuuk - aamma pissutigalugu piniarfissatut nutaatut aalajangerneqartup nunaminertap piniartunit umimmanniarfigineqajuitsuunera.   

 

Aqutsiveqarfik Maniitsoq-mi: Aqutsiveqarfimmi ukiuunerani 2021-mi killilimmik umimmattassiisoqarnissaa Biologinit inassuteqaammik tunngaveqarpoq. Pinngortitaleriffimmiit martsimi 2018-mi kisitsinermiit paasineqarpoq Piniarfik 3-mi aamma Piniarfik 4-mi nunaminertani tikinneqarsinnaasuni umimmaat akuttuvallaalersut.

 

Ukiuunerani umimmanniarnerup nalaani assartuutit motoorillit umimmannut akornutaavallaalersimapput umimmaallu amerlanerit nunaminertanut tikinneqarsinnaanngitsunut ungavartarlutik Biologit kisitsinermi paasineqartut tunngavigalugit oqaatigisarpaat. Piniarfik 2-mi aamma taamaattoqartartoq minnerpaaffiliinikkut kisitsinerni paasineqareerpoq. Assartuutit motoorillit umimmannut akornutaasarnerat millisinniarlugu taamaaliornikkullu norraat amerliseqqinniarlugit ukiuunerani 2021-mi umimmanniarnermi piffissaliussanut ullunik qulinik sivisussusilikkaanut umimmattassiisoqarpoq.

 

APNN-imiit erseqqissaatigineqarpoq assartuutit motoorillit umimmannik ungoorinermi, malersuinermi piniarnermilu atornissaat inerteqqutaasoq umimmannullu minnerpaamik 500 meter-inik ungasissueqarnissaat pillugu inatsimmi aalajangersagaq malinneqassasoq.

 

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl


Ilanngussaq