Juulimaap decembarip ulluisa 24-ianni qulimiguulimmut ilaalluni Nuummut takkunnissaa suleqatigiinnikkut periarfissinneqarpoq

Juulimaap ilequusutut qulimiguulimmut ilaalluni takkuttarnera COVID-19-imit sapersinneqanngilaq. Nakkutigisamik taamaaliornissaq Nunatsinni Nakorsaanerup Politiillu akuersissutigaat

Ukiut tamaasa juulimaap decembarip ulluisa 24-ianni ullaap tungaa Air Greenlandip qulimiguuliutaanut aappalaartumut ilaalluni takkuttarneranik nuannaarutiginnittartunut tamanut nutaarsiassaq nuannersoq. Naatsorsuutiginngisaraluamik – nakkutigineqartumilli Nunatsinni Nakorsaanermit Politiiniillu akuerineqartumik tamanna ingerlanneqassaaq.

 

Juulimaaq najukkanni naapiguk

Inuit amerlasuut ataatsimoornissaat pinngitsoortinniarlugu ukioq manna Nuummi miffissat sisamaapput innuttaasullu najukkaminnut qaninnermi peqataaqqullugit kajumissaarneqarput. Juulimaap miffissaa siulleq tassaavoq Qinngorput narsarsuarmi Atuarfik Hans Lyngip ukkusissallu akornanni. Tassani juulimaaq Qinngutsinni najugalinnik ilassinninniarpoq. Miffissaata tullia tassaavoq ujakkaartartut ikaartarfiata qaqortup Ilisimatusarfiup eqqaaniittup saava. Juulimaap tassani ilassisassarai innuttaasut Nuussuarmi najugallit. Miffissat pingajuat tassaavoq Tuapannguit nuunguani. Miffissarlu kingulleq tassaavoq ilisimaneqarluartoq Dronning Ingridip Napparsimmavissuata saava.

 

Assersukkat ataqqikkit innersuussutillu atuuttut malillugit  

Juulimaaq qulimiguulimmik angalasinnaassappat innuttaasut ikiuunnissaat pisariaqarpoq. Miffissani sisamani tamani assersuisoqassaaq. Qulimiguullip minnerani isumannaallisaanikkut palleqqusaanngitsumik katersuuteqqusaannginnermullu killiliussat eqquutsinneqarnissaannik qulakkeerinissaq assersuinermi siunertaavoq. Taamaammat assersukkat miffimmilu maleruagassat ataqqeqquneqarput.

 

Ukioq manna juulimaaq arpalluni parsiarneqarsinnaanngilaq.

Inuit katersuunnissaannut imminnullu qanillivallaannginnissaannut maleruaqqusat malinniaratsigit qulimiguulik mippat juulimaarlu anillappat arpaliulluta ornissinnaanngilarput. Tamatumunnga taarsiullugu juulimaaq angalaarluni takkuttunut aalaterissaaq ilassiorlunilu. Tamatuma saniatigut juulimaap ikiortai angalaassapput meeqqat takkussimasut – allallu meeqqatut nuannaartut ukioq manna pisarnertut juulimaamit ilassinnissutinnguamik pissarsinissaat qulakkeerlugu.

 

Suleqatigiinneq aalajangiisuusoq

Ukioq manna qulimiguulimmik timmisartuussinissaq Peqqinnissaqarfiup, Air Greenlandip, Nuummi Politiit, Issittumi Sakkutooqarfiup, Nuummi Qatserisartut, Kommuneqarfik Sermersuup, Mittarfeqarfiit, Brugsenip Pisiffiullu suleqatigiilluarnerisut piviusunngorsinnaasimavoq. Taakku tamarmik qulimiguulimmik timmisartuussinissap ilimaginngisaraluamik piviusunngortinneqarnissaa soqutigisaraat.

-    Juulimaap qulimiguulimmut ilaalluni takkuttarnerata ukioq manna taamaatinneqannginnissaa nuannaarutigeqaarput. Tamanna ukiut tamaasa qilaanaarisarparput amerlaqisunullu qanoq pingaartinneqartigisoq nalunngilarput, peqqissasut qullersaat Ella Skifte oqarpoq.

 

Pisariaqassappat sillimasoqarpoq

Sila atoruminaassappat silimasoqarpoq. Ukiualuit matuma siorna pisoqarnerasut, juulimaap qulimiguulimmik takkunnissaanut sila akornusiissappat angallassisussatut angalanissallu qulakkeernissaanut Nuummi Qatserisartut piareersimapput. Taamaalilluni juulimaaq ilassineqarsinnaassaaq, ikinngutit sanilillumi juullimi pilluaqquneqarsinnaassallutittaaq.

 

Miffissatut naatsorsuutigineqartut:

  1. Qinngorput nal. 09:30
  2. Nuussuaq, ujakkaartartut ikaartarfiat, nal. 10:00
  3. Tuapannguit nal. 10:30
  4. Dronning Ingridip Napparsimmavissua nal. 11:00

 

—————————————————————————————

 

Apeqqutissallit Peqqinnissaqarfimmi qullersaqarfimut ugguuna saffiginnissinnaapput:

sundhedsledelsen@peqqik.gl