UTOQQALIARTORTUT AMERLIARTORPUT

Ukiuni aggersuni utoqqalinersiallit malunnaatilimmik amerliartortussaapput. Kisitsisit ersersippaat kalaalerpassuit nunarput qimattaraat, nunani allani najugaqalernissartik qinertarlugu, uani Danmark qinernerusarlugu. Taamatuttaaq nunatsinni utoqqaat amerliartornerat ersarilluni.

HS Analyse/bank naatsorsueqqissaartarfia malillugu maannakkut utoqqalinersiallit 67-niit qummut ukiullit 3.954 amerlatigaat. Inatsillu nutaaq 1.1.2021-mi atuutilersoq malillugu utoqqalinersiaqalerniaraanni 67-nik ukioqartariaqarluni.

Utoqqalinersinissamut ukiut killigitinneqartut utoqqaat amerliartornerat ilutigalugu qaffaqattaaginnarneqarsinnaanngilaq. Utoqqaat sulerusuttut sulisinnaapput, ilaqarpulli utoqqalivallaanngikkaluarlutik suliinnarnissaminnut naleqqukkunnaarsimasunik, pissutsit assigiinngitsut atukkallu peqqutaasinnaallutik.

Naatsorsueqqissaartarfiup kisitsisaataani takuneqarsinnaavoq inuit ukioqqortusiartortut, ullumikkut inuuneqqortussuseq agguaqatigiisillugu arnat 74,1 ukioqalernerusarput (2015-2019) qaffassangallunilu 78,1 (2050-mi) agguaqatigiisillugu angutit ukiorilikkajuppaat 69,5 taakkulu qaffassangatinneqarlutik 74-nut 2050-mi, tamanna takussutissaavoq inuuneqqortusiartornitsinnut.

Utoqqaat 67-lileereersimasut tassaapput Nunatsinnik piorsaaqataasimasut, maanna inuuffigisatsinni ullutsinni taaneqartartumi ”inuiaqatigiit atugarissaartut” Amerlanerit ilinniarsimasuunikuunngillat. Taamanikkut allarluinnarnik piumasaqaateqarfiusuninngaanneerput, taamanikkut inatsisinik malittarisassanilluunniit atuuttoqanngilaq soorlu ullutsinnut naleqquttumik inissaqarneq, suliffimmi sillimaniarneq. Amerlasoorpassuit ukiuni arlalinni sulinermikkut sulerulussimapput nungullarnikuullutillu, nunatsinni sullissinerminnut suliaminnullu naleqquttumik akilerneqarnikuunngitsunik taarusutannik.

Pingaarnertullu taasariaqarpoq taakku utoqqaat ataqqissallugit, naligisatullu pissallugit maanna uagut inuuffigisatsinni.

Ukiuni kingullerni ineqarnerup, kiassarnerup pisiassallu akiisa qaffakkaluttuinnarnerannut taarsiullugu Inatsisartuni qinikkat amerlasuut suliniuteqarniarlutik aaqqissuusserusunnerat tikilluaqquara.

Utoqqaat amerlasuut utoqqalinersiaannarminnik isumalluutillit amerlaqaat. Toqqortaqalaarnissaminnut sinneqartoortanngillat. Neriuutigaaralu utoqqalinersiutit malunnaatilimmik qaffanneqarumaartut.

Piffinni kingullerni nunatsinni qinikkat ”arsanik amerlasuunik milorujussuisaqaat” Neriuutigaara qinikkat arsamik pingaarnersiuillutik akorsilluarumaartut, inatsisissatullu siunnersuutigisartagaat inuiaqatigiinnut iluaqutaalluarumaartut.

Taamaattorli isumaqarpunga pigissaarneq assigiinngitsutigut amerlasuunit atorneqartoq, tassa Nunatsinni ukiorpassuarni inooriaaseq allaanerusoq atorlugu inuusoqarnikuummat, inuunerinneq, tassa pigissaarneq pinngortitamiit peqqarniitsumiit atorlugu inuusoqarnikuummat.

Utoqqartatsinnit inuunermik tunngaviusumik ilikkagaqarsinnaavugut.

Eqqaamallugu utoqqartavut ataqqisassarigatsigit.

Ukiortaami pilluaritsi

 

Helene Heilmann

Utoqqaat Illersuisuat