Ilulissani inuit arfinillit Covid-19-imik tunillatsissimasut uppernarsarneqartoq

Ullumi sapaammi 20-12-2020 Ilulissani Covid-19-imik tunillatsissimasut arfinillit nassaarineqarput. Taakku tamarmik tikinnerminniit ullut tallimassaanni misissortinnerminni pasineqarput, aammalu 15. Aamma 16. Decembarimi nunatsinnut tikissimallutik.

 

Ilaqutariit ataatsit pingasunik inuttallit tunillatsissimapput. Taakkunannga marluk Ilulissanut tikissimapput. Angalaqatigiillutik tikittut allat marluk aamma tunillatsissimapput. Taakku arfernat inummik allamik angalaqateqarluni tikissimavoq, kisiannili tikeqataa ullumi misissortinnermini tunillatsissimanngitsoq paasineqarpoq. Inuit pineqartut ilisimatinneqareerput mattunneqarlutillu.

 

Suliat pingasuusut tamarmik politiinit, peqqinnissaqarfimmit nakorsaaneqarfimmiillu misissuiffigeqqissaarneqarput. Paasissutissat pigineqartut malillugit taakku tamarmik angerlarsimaannartussaanermut maleruaqqusanik malinnissimapput. Qanigisaat tamarmik tunillatsissimasutut pineqarput. Taamaattumik Nakorsaaneq naliliivoq, Ilulissani tuniluuttoqarnissaanut ulorianartorsiorneq killeqartorujussuusoq.

 

Ilulissaniittut tamaasa qinnuigaagut, oqartussaasunit pissutsit paasilluarneqarnissaasa tungaanut eqqissisimaqqullugit. Sapaatit akunneranni kingullermi pisuni arlalinni inuit attaveqaqatigiittarfiisigut oqaatsinik angallassisoqarpoq, taamaattumillu tamassinnut kaammattuutigissavarput oqartussaasut aqqutigalugit paasissutissanik ujarlertaqqullugi, aammalu oqaatsit angalanerinut peqataanaveersaaqqullusi.

 

Timmisartut, Ilulissat avannaani sumiiffinnut tamanut aallartussat tamarmik siusinnerpaamik ataasinngornermi nal. 10 aallassapput.

 

Ilulissani innuttaasut qanoq iliussappat?

 

Pissutsit malinnaaffigeqqissaarneqarput, taamaattumillu annertunerusumik ilisimasaqalernissatta tungaanut Ilulissani innuttaasut allanut, pingaartumillu inunnut, Covid-19-imik tunillatsinnerminni napparsimarujussualersinnaasunut attaveqarnerminnik killilersuisaapput.

 

Ilulissani innuttaasut tunillatsissimanerminnik ersiutillit Ilulissani peqqinnissaqarfimmut oqarasuaatikkut attaveqaqqullugit kajumissaarneqarput. Innuttaasut ersiuteqanngitsut, aammalu misissortinnissamik oqartussaasuniit qinnuigineqarsimanngitsut Covid-19-imut misissorneqassanngillat. Peqqiinnissaqarfimmi isumalluutit inunnik eqqortunik misissuinissamut atorneqarnissaat pingaaruteqartorujussuuvoq. Inuit ataatsimoortut allat misissortissappata, oqartussaasut tamanna pillugu nalunaaruteqarumaarpoq.

 

Innuttaasut peqqinnissamut oqartussaasunit innersuussutinik malinninnissaq eqqumaffiginerusariaqarpaat:

 

  • Errortukulagit aammalu assannut spriti atortaruk
  • Kakkissarfimmut imaluunniit atsipaannut quersortarit tangajortarilluunniit – assannuunngitsoq
  • Qitserarnak. Qiseq allanut tunillaanissamut aallaaviusinnaavoq
  • Assammiinaveersaarit, ersakkut kunissinaveersaarit aammalu pakkussinaveersaarit – timivit allanut attuutsinnissaa killilersoruk
  • Eqqiaalluartarnissaq eqqumaffigiuk – angerlarsimaffinni suliffinnilu
  • Sumiiffiit inunnut allanut qanilliffiusartut orninnaveersaakkit

 

Tikittut: Ulluni siullerni 14-ini mianersoqqissaarit

 

Eqqiluisaarnissaq eqqumaffigilluaruk aamma inunnut allanut qanillinaveersaarit. Tamanna tikinnermiit piffissamut angerlarsimaannarfiusussamut aammalu ullut 14-it tikillugit atuutissaq, aammaluunniit tikinnermiit ullut tallimassaanni misissortissimagaluaraanni. Ullut siullit 14-it ingerlanerini COVID-19-imut malunniuteqaruit erngerlutit peqqinnissaqarfik attaveqarfigissavaat.

 

Malunniutit

 

Angerlarsimaannartussaatitaaguit, imaluunniit immaqa tunillatsinnissamut ulorianartorsiorsimaguit malunniutit uku eqqumaffigilluassavatit:

 

• Panertumik quersorneq

 

• Kiaqarneq

 

• Nukilerineq

 

• Anersaartorniapiloorneq

 

• Toqqusaarlunneq

 

• Mamassutsinik malussarsinnaajunaarneq naamasaqarsinnaajunnaarnerlu

 

Malunniutit taakku arlaannik malugisaqaruit najukkanni peqqinnissaqarfimmut sianissaatit. Paasissutissat annertunerusut www.nun.gl aqqutigalugu nassaarisinnaavatit – mobildata aqqutigalugu akeqanngitsumik iserfigisinnaavat.

 

Tunillatsittut amerlaneri maannarpiaq Kalaallit Nunaanni tunillatsinnissamut ulorianartorsiortitsisut ersarissorujussuuvoq. Danmarkimi tunillatsissimasut amerlasoorujussuupput, aammalu maannarpiaq juullisioriarlutik angalasut amerlapput. Kalaallit Nunaanni tamani inuit tamarmik piffissami aggersumi tuniluuttoqarsinnaanera eqqumaffigisariaqarpaat, aammalu Covid-19-imut malunniutillit erngerlutik peqqinnissaqarfimmut oqarasuaatikkut attaveqassapput.

 

Paasissutissat amerlanerusut:

 

Nakorsaaneq Henrik L. Hansen