Kalaallit Nunaanni pinerluttarneq inatsisinillu unioqqutitsisartut pillugit nalunaarusiaq nutaaq

Nalunaarusiaq Kalaallit Nunaanni Eqqartuussiveqarneq pillugu Siunnersuisoqatigiinnit ilisimatuumut Britta Kyvsgaardimut suliassanngortinneqarsimasoq Justitsministereqarfiup saqqummiuteqqammerpaa.

Kalaallit Nunaanni pinerluttarnerup allanngoriartornerani suut pinerluutigineqartarnersut qanorlu annertutigisumik kiisalu inatsisinik unioqqutitsisartut nunap inuiaqatigiillu katitigaanerini qanoq agguataarnerat nalunaarusiami allaaserineqarput. Naatsorsueqqissaartarfiup paasissutissaatai atorlugit inatsisinik unioqqutitsisartut inuuniarnikkut atugaat, pineqaatissiisarnerit pinerluutigisallu suuneri kiisalu suiaassutsit ukiullu inuiaqataasunut sanilliullugit naatsorsoqqissaarneqarput. Misissueqqissaarnermi paasisat atorlugit Danmarkimi nunatsinnilu pinerluttarnerit qanoq assigiinngitsiginera annertutigineralu aamma takussutissiorneqarpoq.

”Nunatsinni inatsisit atuutsinneqarnerisa ukkatarineqarnerat, sukumiisumillu paasiniaanissamut isumalluutinik immikkoortitsisoqartarnera qujanarpoq. Pinerluttarneq, qanorlu siammartarnera ilisimasaqarfiginerugutsigut akiornissaanut sillimanerussaagut”, Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen oqarpoq.

”Nunatsinni inatsisinik atuutsitsinermut Justitsministereqarfillu eqqartueqatigiinnermi nalunaarusiap suliniutissanik pingaarnersiuinissamut atorneqarsinnaanera, innuttaasunilu inatsisitigut eqqartuussisoqarnikkullu naapertuilluarnermik misigineq pillugu oqallinnermik pilersitsisinnaanissaa neriuutigaara. Naalakkersuisut pinerlunnermik eqqugaasut inatsisinillu unioqqutitsisimasut inuiaqatigiinnut akuleruteqqissinnaanissaat suliniutigivaat”, Naalakkersuisoq Martha Abelsen erseqqissaavoq.

Nalunaarusiaq Justitsiministereqarfiup nittartagaani uani atuarneqarsinnaavoq.


Paasisaqarnerorusukkuit Naalakkersuisoqarfimmi pisortaq Julie Præst Wilche attavigisinnaavat e-mail: jprw@nanoq.gl