Utoqqalinersiaqalernissamut ukiut killissaritinneqartut nutaat 2021-imi atuutilissapput

Ulloq 1. januaari 2021 utoqqalinersiaqalernissamut ukioritinneqartoq 67-inut qaffatsinneqassaaq. Nungullarsimasunut siusissumik utoqqalinersiaqarsinnaaneq ukiunut 65-inut attatiinnarneqassapput.

Nunatsinni inuunertusigaluttuinnarpugut, utoqqarpassuit sulisinnaallutillu sulerusupput inuiaqatigiinnullu naleqaqalutik. Utoqqartatta suliffeqarfimmut tunniusseqataajunnaaraluarlutik inuiaqatigiinni suleqataallutillu peqataaginnarsinnaallutik utoqqalisinnaanertik takusinnaanissaat pingaaruteqarpoq. Naalakkersuisut naalakkersuisooqatigiillu taamaammat 2021-mut Aningaasanut inatsimmut atatillugu ukiuni 35-ini sinneqartuni timikkut tarnikkulluunniit artukkiisumik sulereerluni siusissumik utoqqalinersiaqarsinnaanerup ataavartumik pisinnaatitaaffinngorlugu attanneqarnissaa aalajangersimavaat.

”Utoqqalineq inuiaqatigiinnullu peqataaneq nuannersuussaaq, toqqissisimanarlunilu sapinngisamik aamma pitsaasuulluni. Taamaammat utoqqartavut ukiorpassuarni timikkut tarnikkulluunniit artukkiisumik sulisimasut immikkut paarilluartariaqarpagut”, Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen oqarpoq.

Siusissumik utoqqalinersiaqalernissamik qinnuteqaatit kommunimit suliarineqassapput. Siusissumik utoqqalinersiaqalerniaraanni 65-inik ukioqalersimassaaq sulili 67-inik ukioqalersimassanani. Ukiut 35-it sinnerlugit timikkut tarnikkulluunniit artukkiisumik sulisimassaaq sulilu suliffeqarluni. Qaqugukkut qanorlu nungullarsimaneq inummiit inummut assigiinnavianngillat. Qinnuteeqaatip suliarinerani paasissutissat naleqquttut tamarmik ilanngullugit kommune sulissaaq, pisariaqarsorineqarpat nakorsamit nalunaarut aamma immaqa ilanngullugu. Taamaammat sioqqutsilluni qinnuteqarnissaq pingaaruteqarpoq, ajornanngippat 65-iliinnginnermi qaammatit marluk sioqqullugit.

Utoqqalinersiat pillugit paasisaqarnerusinnaavutit siusissumillu utoqqalinersiat pillugit uani

Paasisaqarnerunissamut attavigineqassaaq Naalakkersuisoqarfiup pisortaa Julie P. Wilche, e-mail: jprw@nanoq.gl