UNICEF Danmarkip Namminersorlutillu Oqartussat akornanni suleqatigiinnermut isumaqatigiissut ukiunik tallimanik sivitsorneqarpoq

UNICEF Danmarkip Namminersorlutillu Oqartussat akornanni suleqatigiinnermut isumaqatigiissutip NAKUUSA-mik ilusilerlugu atulersinneqarnera ukiut qulit qaangiummata aallartippoq, massakkullu suliamut akuusut isumaqatigiissut suli ukiunik tallimanik piffissamut 2021-2025-mut sivitsorpaat.

Ukiut siulliit qulit ingerlaneranni suleqatigiinnikkut pingaarutilinnik angusaqartoqarsimavoq. Meeqqat Kalaallit Nunaannit tamarmit Meeqqat ataatsimeersuarnerannut ukiumoortumik 2011-miit naapittarput, kommunini tamani aamma Tunumi Qaanaamilu meeqqat isummersorfii pilersinneqarlutik, soorlu aamma Kalaallit Nunaanni atuarfinnit 81-iusunit 46-t  ullumikkut  Nakuusaaraqarfiusut.

Nuna tamakkerlugu isummersinnaanermut suliniutit annertuut tallimat aqqutigalugit ilaatigut angajoqqaat akisussaaffii, atuarneq kinguaassiuutitigullu atornerluinerit annertuumik ukkatarineqarnerat qularnaarneqarpoq. Innuttaasut akornanni suliniutit NAKUUSAlu ilisimaneqarluarput, tassami 2020-imi inuit aperineqartut 92 %-iisa NAKUUSA nalunngimmassuk.

Ukiuni tulliuttuni tallimani suleqatigiinnermi makku nukittorsarneqarlutillu ineriartorteqqinneqassapput:

- Meeqqat pisinnaatitaaffiisa suli annertunerusumik ingerlateqqinneqarnissasa qularnaarnerat
- Pisinnaatitaaffiit pillugit atuarfinni suliniutit nalilernissaat nukittorsarnissaallu (tassunga ilaavoq Nakuusaaqqat).
- Kommunini tamani Meeqqat Isummersorfiisa ingerlanneqarnerat tapersersornerallu, aamma Tunumi Qaanaamilu.
- Suliniutit isummersinnaanissamut sunniisut.

Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen oqarpoq:
UNICEF Danmarkimik NAKUUSA pillugu suleqatigiinnerput nangissinnaagatsigu nuannaarutigaarput. Meeqqat pisinnatitaaffii meeqqanullu pissutsit Naalakkersuisut politikianni pingaaruteqarluinnarput piujuaannartitsisumillu ineriartornerup ilagalugu.”

Ilinniartitaanermut, Kultureqarnermut Ilageeqarnermullu Naalakkersuisoq Katti Frederiksen isumaqataavoq:
Kalaallit Nunaanni meerartatsinnut sapinngisamik pitsaanerpaanik atugaqartitsinissatta qularnaarnissaa pingaaruteqaqaaq. NAKUUSA tassunga annertuumik ilaasinnaavoq, soorlu ukiuni kingullerni qulini tamanna takugipput. Meeqqat pisinnaatitaaffii siuarsarneqassapput Kalaallit Nunaannilu meeqqat pisinaatitaaffii pillugit sulinermik ineriartortitseqqinnissamut tunngavissaq massakkut pilersipparput”.

UNICEF Danmarkip siulittaasua, Alfred Josefsen, suleqatigiinneq 2010-mi aallarnerneqarmat aamma peqataasoq ukiut ingerlaneranni NAKUUSAp ingerlanneqarneranut malinnaasimavoq:

Naalakkersuisunik suleqateqarnitta nangeqqinneqarnera nuannaarutigaarput. NAKUUSA aqqutigalugu meeqqat nipaasa tusarneqarnissaat qularnaarparput. Inuiaqatigiinni meeqqat pisinnaatitaaffiisa qularnaarnissaat immikkullu ilisimasalinnit siaruarterneqarnissaa peqataaffigissallugu UNICEF Danmarkimut pingaaruteqarpoq, tamannalumi NAKUUSA aqqutigalugu peqataaffigaarput”.

 

Isumaqatigiissut ullumi tallimanngornermi 18.decembari 2020 atsiorneqarpoq.

Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen aamma Ilinniartitaanermut, Kultureqarnermut Ilageeqarnermullu Naalakkersuisoq Katti Frederiksen atsiorput UNICEF Danmarkip Siulersuisuisa Siulittaasuat Alfred Josefsen peqatigalugu.



Isumaqatigiissut tamarmiusoq uani atuarneqarsinnaavoq: https://nakuusa.gl/


Paasisaqarnerorusukkuit attavigikkit:

UNICEF Danmarkip Kalaallit Nunaanni allaffeqarfiani pilersaarutinut pisortaq Maliina Abelsen: mabelsen@unicef.dk /
+299 548660

Isumaginninnermut,Ilaqutariinnut Inatsisinillu Atuutsitsinermut Naalakkersuisoqarfimmi pisortaaneq Julie Præst Wilche: jprw@nanoq.gl

Ilinniartitaanermut, Kultureqarnermut Ilageeqarnermullu Naalakkersuisoqarfimmii pisortaaneq Karsten Peter Jensen: kapj@nanoq.gl