Kuannersuarmut VVM-mik VSB-millu nassuiaatit tusarniaatigineqarnerat aallartippoq

Naalakkersuisut ulloq 17. december 2020 Greenland Minerals A/S-p Kuannersuarni aatsitassanik qaqutigoortunik suliniutaa pillugu VVM-mik VSB-millu nassuiaatinik tamanut ammasumik tusarniaanerup aallartinneqarnissaa akuersissutigaat. Piffissaq tusarniaaviusoq ulloq 18. december 2020 aallartinneqassaaq sapaatillu akunneri aqqaneq marluk qaangiuppata ulloq 12. marts 2021 naammassissalluni. Piffissami tusarniaaviusumi Igalikumi, Narsami, Narsarsuarmi, Qaqortumi Qassiarsunnilu tusarniaalluni ataatsimiititsinernik ingerlatsisoqarnissaa Naalakkersuisut aalajangerpaat. Tusarniaalluni ataatsimiititsinerit qaqugu pinissaat www.naalakkersuisut.gl-ikkut tamanut nalunaarutigineqassaaq.

Tusarniaanermi atortussiat www.naalakkersuisut.gl-ikkut tamanut saqqummiunneqarnerat Naalakkersuisut tusarniaanermi atortussianik inaarutaasumik akuersinerattut paasineqassanngilaq. Taamatut akuersineq aatsaat IBA-mik atsiornikkut qalluinissamillu akuersissummik tunniussisoqarneratigut pissaaq.

Inuussutissarsiornermut Aatsitassanullu Naalakkersuisoq Jens-Frederik Nielsen ima oqaaseqarpoq: ”Tamanut ammasumik tusarniaaneq Kalaallit Nunaannut tamarmut alloriarneruvoq pingaarutilik sivisuumik utaqqineqartoq. Piffissami tusarniaaviusumi soqutiginnittut tamarmik oqaaseqarnissamut aarlerissutiminnillu saqqummiussinissaminnut periarfissaqassapput. Oqaatigineqartut tamarmik suliarineqassapput hvidbogimilu akineqassapput, VVM-millu VSB-millu nalunaarusiat nutarterneqarnerannut tunngavissiissallutik.”

Kalaallisut, qallunaatut tuluttullu tusarniaanermut atortussiat kiisalu pappiaqqat tunuliaqutsiissut uani nassaarineqarsinnaapput.