OLT-mi Ministerit decemberip arfineq 8-ni 2020 ukiumoortumik ataatsimiinneranni Steen Lynge peqataavoq

Nunat Namminersortitallu Imarpiup Akianiittut (OLT) ministerii decemberip 8-ni 2020 ukiumoortumik ataatsimiinnerat Curaçaoip naalakkersuisuisa siulittaasuat Eugene Rhuggenaath aqutsisoralugu ataatsimiipput.

Nunanut allanut Nukissiuuteqarnermullu Naalakkersuisoq ukiumoortumik ataatsimiinnermi peqataavoq. Steen Lyngep Nunanut allanut Nukissiuuteqarnermullu Naalakkersuisoqarfimmit atorfilittat Nuummit Bruxellesimiillu peqatigai. Nualluut COVID-19 pissutigalugu ataatsimiinneq isiginnaarutikkut ingerlanneqarpoq.

Ministerit ukiumoortumik ataatsimiinnerat OLT-iikkormiut ataatsimeersuarfigisarpaat. Ataatsimiinnerup siunertaraa ukiumi tullermi politikkikkut allaffissornikkullu OLT-it Kattuffiannit OCTA-mi sinaakkutissat aalajangersarneqarnissaat. Ilanngullugu aamma OCTA-mi siulittaasussamut, siulittaasup tullianut, il.il. qinersinerit assigiinngitsut ingerlanneqartarput

Ny Kaledoniap Curaçao kingoraarlugu OCTA-mi siulittaasutut qinerneqarpoq. Kalaallit Nunaat OCTA-mi siulittaasup tulliatut qinerneqarpoq, ilimanaateqarporlu Kalaallit Nunaat 2022-mi OCTA-mi siulittaasunngornissaa. Ulluinnarni aqutsisut, Executive Committee (ExCo), siulittaasussaat ilaasortassaallu aamma inissinneqarput. Arubap ExComi præsidentinngorpoq St. Pierre et Miquelon 2020 annersaani tassani inissisimasimanikoq kingoraarlugu. Kalaallit Nunaat aningaaserisutut ingerlaannarallarpoq, taassumalu saniatigut ExCo-mi nalinginnaasumik ilaasortaanerput tigummiinnarlugu.

Ataatsimiinnermi Steen Lynge siulittaasup tulliatut qinerneqarnermut qujassuteqarpoq, oqaatigaalu neriuutigalugu 2022-mi OLT-eermiut Kalaallit Nunaannut tikilluaqqusinnaajumaarlugit.

Taassuma saniatigut Nunanut allanut Nukissiuuteqarnermullu Naalakkersuisup sinniisut OLT-meerstu allat peqatigalugit ukiumoortumik Politikkikkut Nalunaarut aammalu Allaffissornikkut Aalajangersakkat akuersissutigaat.

OLT-it Ministeriisa ataatsimiittarnerat nalinginnaasumik ukiumoortumik OLT-EU-Forum ingerlatinnginnerani ingerlanneqartarpoq. Taamaalillutik OLT-eermiut iluminni ukiuni aggersuni OCTA-mi sinaakkutissat isumaqatigiissutigisarlugit ataatsimoorfimmilu aqutsinermi ilaasortassat Europa-Kommissionimik ataatsimeeqateqannginnermi inississorneqartarlutik. OLT-EU-Forumimi OLT-eermiunik suleqatigiinnermut Europa-Kommissæri akisussaasuusoq Jutta Urpilainen ingerlatsisuussaaq.

Attavissaq: Mininnguaq Kleist mobil: +32 499 99 98 58, E-mail: mikl@nanoq.gl