Steen Lyngep OLT-EU-Forumimut 2020 peqataavoq

OLT-EU-Forumimi decemberip 10-ni 2020 isiginnaarutikkut ataatsimiinneranni Nunat tamalaanut Suleqatigiinnermut Europa-Kommissæriusoq Jutta Urpilainen aqutsisuuvoq. Kalaallit Nunaat sinnerlugu Nunanut allanut Nukissiuuteqarnermullu Naalakkersuisoq Steen Lynge ukiumoortumik Forumimut, nunat namminersortitallu imarpiup akianiittut (OLT) EU-mik ataatsimeeqateqarneranni peqataavoq.

Europa-Kommissionip peqataatitai Europa-Kommissærimit, Jutta Urpilainenimit EU-mi OLT-nik suleqateqarnermut kommissæritut akisussaasuusumit siuttoqarput. Taassuma saniatigut Nunat ilaasortaasut pingasut OLT-eqarfiusut peqataatitaqarput. Tassani Danmarkip Nunanut allanut Ministeriat Jeppe Kofoed Hollandimi Frankrigemilu ministerit peqatigalugit peqataavoq.

OLT-EU-Forumimi aammalu OLT-it Ministeriisa ataatsimiinneranni pingaarnertut pingasunik oqaluuserisaqartoqarpoq: COVID-19, Brexit aammalu EU-p OLT-nut Kalaallit Nunaannullu suleqatigiinnissamut aaqqissuussaq.

Peqataasut tamavimmik pisut ajornartitsinerisa nalaanni isiginnaarutikkut ataatsimiinnermik peqataanertik iluarisimaarlugu oqariartuutigaat, ataatsimiinnermit peqataapput qeqertat Manerassuarmiittu, Karibiamiittut, Atlantikup avannaaneersut kujataaneersullu kiisalu aamma Europamit peqataasoqarluni.

Sapaatip akunnerata aallartinnerani tuluit OLT-vi, OLT-Ministerit ataatsimiinneranni peqataapput, Brexitili pissutigalugu OLT-EU-Forumimi peqataanissaannut peqataatinneqaratik. Januarip aallaqqaataanit tuluit OLT-vi EU-mi OLT-tut inissisimanertik annaassavaat, EU-llu isumaqatigiissutaata avataaniittutut EU-mi inissisimalissallutik.

OLT-EU-Forumimi Naalakkersuisut sinnerlugit Steen Lynge oqaaseqartuuvoq, imatullu oqariartuuteqarpoq:

”Europa-Kommissionimik toqqaannartumik oqaloqateqarsinnaanermik periarfissaqarnerit tamarluinnaasa periarfissap atorluarnissaa pingaaruteqarpoq. OLT-EU-Forumimi EU-mi suliat ingerlasuutitta ilaasa oqaaseqaateqarfiginissaanut periarfissaq atorpara, oqariartuutigalugulu EU-mik OLT-eermiunillu suleqateqarnerput pingaartikkatsigu.”


OLT-eermiut EU-llu suleqatigiinnerat tamanut inerititaqarfiullunilu iluaqutitaqarpoq. Malunnarluarporlu OLT-nit EU-miillu Forumimi peqataasunit tamanit kissaatigineqarmat suleqatigiinnerup pitsaasoq ukiuni aggersuni ingerlalluaannarnissaa kissaatigineqartoq malunnarpoq.

Pisut pillugit Naalakkersuisoq nangilluni ima oqaaseqarpoq:

”Nunarsuarmi tamanit OLT-it amerlasuut ataatsimut peqatigalugit OLT-Ministerit ataatsimiinneranni aammalu OLT-EU-Forumimi Kalaallit Nunaat sinnerlugu peqataaneq pissarsiaqarfiulluarlunilu pissanganarpoq. Pisoqarnernut taamaattunut Kalaallit Nunaata ersarilluni, isummanik annissinikkut akisussaaffimmillu tigusilluni iliuuseqarluni peqataasarnissaa pingaaruteqarpoq.

Neriuutigaara qilanaaralugulu ukiut marluk qaangiuppata Kalaallit Nunaata OCTA-mi immaqa siulittaasunngornissaa. Tassuuna nunarsuarmi inissisimanerput pingaartumik EU-p iluani ersarinnerpullu nukittorsassavaa, minnerunngitsumillu OLT-mi aallartitat aammalu Nunat tamalaanut Suleqatigiinnermut Europa-Kommissæri allallu maani nunatsinni pisoqartitsinernut qaaqqusinikkut aqutsisuunitsigullu.”



Attavigisassaq: Mininnguaq Kleist mobil: +32 499 99 98 58, E-mail: mikl@nanoq.gl