ILO pillugu ataatsimiititaliap ataatsimiinnera

Kalaallit Nunaata ILO pillugu ataatsimiititaliaata nutaap ataatsimeeqqaarnerani Inuussutissarsiornermut Suliffeqarnermullu Naalakkersuisoqarfik ulloq 2. decembari 2020-mi qaaqqusisuuvoq, tassanilu peqataapput Sulisitsisut Sulisullu sinniisuutitat. 2020-mi upernaakkut ILO pillugu ataatsimiititaliaq siullermeertumik ataatsimiittussaasimagaluarpoq, COVID-19-illi nassataraa Naalakkersuisoqarfiup kinguartitsisariaqarsimanera.

Nunat tamalaani sulisarnermut najoqqutassanik inissiinikkut inooqatigiinnermi naapertuilluarnermik, suliffimmilu atugassanik naammaginartunik siuarsaanissamik siunertaqarluni Sulisoqarneq pillugu Naalagaaffiit, ILO (International Labour Organization), Naalagaaffiit Peqatigiit (FN-ip) ataaniippoq. ILO assissaqanngitsumik illua’tungeriinnik pingasunik sananeqaateqarpoq, nunarsuarmit tamarmit naalagaaffinnit, sulisitsisunik sulisartunillu sinniisut sulisarnermi najoqqutassat ammasumik oqaluuseralugillu pinngortittarlugit. ILO-mi nunat ilaasortat 187-iupput, suliffeqarfimmilu pissutsinut tunngasunik isumaqatigiissutit 180-inik amerlanerusut akuersissutigisimavai.

Danmarkimit suliassaqarfik Namminersorlutik Oqartussat tigusaqaraangata nunap ilaaffiginissaannik kissaatigisaanut isumaqatigiissutinut taakkununnga Kalaallit Nunaat nammineq aalajangiisinnaatitaaffeqartarpoq. Kalaallit Nunaat isumaqatigiissummik akuersissuteqaraangat isumaqatigiissutip atuutsilernissaanut malittarinissaanullu pisussaaffigisaq malitsigisaasarpoq, kiisalu ILO-mut ingerlanneqartuartumik namminersuutigisamillu nalunaaruteqartoqartassaaq. Kalaallit Nunaata ILO-mi isumaqatigiissutit 17-it (18-inngungajalersut) akuerisimavai.

ILO-p ataaniittutut apeqqutini suliffeqarfimmi suliassaqarfimmi illua’tungeriit pingasut suleqatigiinnerisa ataqatigiissaarlugillu siuarsarnissaat siunertaralugu Kalaallit Nunaanni ILO pillugu ataatsimiititaliaq pilersinneqarpoq. Nunat tamalaani suleqatigiinnermut, ilanngullugu ILO-mut kinguneqartussamik akisussaaqataaffimmik Kalaallit Nunaata tigusinninnera pingaaruteqartuullunilu akuersaarnarpoq.

Ukiumut aalajangersimasumik ILO pillugu ataatsimiititaliaq ataatsimiittarpoq. ILO pillugu ataatsimiititaliap tullissaanik ataatsimiinnissaa apriilip naanerani pissaaq.

Tusagassiorfinnut nalunaarummut matumunnga tunngasunik ilassutinik paasissutissarsioraanni Inuussutissarsiornermut Suliffeqarnermullu Naalakkersuisoqarfimmi Naalakkersuisoqarfiup pisortaanut Isak Nielsen Kleistimut saaffiginnittoqarsinnaavoq: Oqa.: (+299) 345634, email: ISNK@nanoq.gl