Ilaqutariinni meerartaarnermi atugassarititaasunik meerartaarnermi sulinngiffeqarneq pillugu inatsit nutaaq pitsanngorsaavoq

Inuiaqatigiinni ilaqutariit toqqammaviupput. Naalakkersuisut meerartaarnermi sulinngiffeqartarneq pillugu inatsit nutaaq aqqutigalugu ilaqutariit atugaannik taamaammat pitsanngorsaapput, ilaqutariit ilorrisimaarnerulernissaat tunngavissaqalersillugit. Meerartaarnermi sulinngiffeqartarneq pillugu inatsisip naligiissitaaneq, ilaqutariit aningaasaqarnikkut atugarisaat erninerullu siorna kingornalu sulisut pisinnaatitaaffii pitsanngorsarpai.

Inatsisartut isumaqatigiittut meerartaarnermi sulinngiffeqartarneq pillugu inatsit nutaaq ulloq 11. novembari 2020 akuersissutigaat. Nunatsinni angajoqqaanut meerartaarnermi atugassarititaasut pitsaassusaat meerartaarnermi sulinngiffeqartarneq pillugu inatsimmi nutaamik tunngavilerneqarput, tamannalu meerartaarnermi sulinngiffeqartarnissaq sulisitsisumut sulisartumut angajoqqaanullu pilerinarnerulersitsissaaq.

Meerartaarnermi sulinngiffeqartarneq pillugu inatsit nutaaq pingaarnertut immikkoortunik arlalinnik imaqarpoq, taakkualu immikkut tamarmik ilaqutariit atugaannik pitsanngorsaaqataassapput:
  • Suliffeqarfinnut namminersortunut meerartaarnermut aningaasaateqarfik ataatsimut akisussaaffeqaqatigiittut naligiissaarinermik aningaasaateqarfiuvoq, meerartaarnermut atatillugu akissarsianut aningaasartuutit sulisitsisut tamarmiusut akornanni agguataarneqarnissaannut qulakkeerinnittussaq.
  • Erninissaq sioqqullugu sulinngiffeqartarnerup sivitsorneqarnissaa aamma ernisut illoqarfinni nunaqarfinnilu ernisitsiviusinnaanngitsuni najugallit immikkut eqqarsaatigalugit.
  • Naatsorsueriaaseq nutaaq angajoqqaanut meerartaarnermi ullormusialinnut aningaasatigut atugaasa pitsanngorsarneqarnissaannut atorneqassaaq.
  • Meeqqamik annaasaqarnermi sulinngiffeqarsinnaatitaaneq
  • Angajoqqaat sulinngiffeqarnermi sapaatip akunneri sisamat kingulliit qanoq atussanerlugit namminneq aalajangersinnaanngorpaat.
  • Ilaqutariinnut meeravissiartaartunut pissutsit pitsaanerusut
  • Ilaqutariinnut paarsisartunut pissutsit pitsaanerusut
”Ilaqutariinnut atugassarititat ingerlaavartumik pitsanngorsarneqarnissaat aalajangiisuulluinnarpoq. Meerartaarnermi sulinngiffeqartarneq pillugu inatsit nutaaq aqqutigalugu meerartaarnermi malittarisassanik nutartereqataavugut. Naligiissitaaneq pitsanngorsarneqarpoq. Ilaqutariit aningaasaqarnikkut atugaat pitsanngorsarneqarput. Sulisut pisinnaatitaaffii erninerup siorna kingornalu pitsaanerulerput”, Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen oqarpoq.

Ullut atuutilerfiusussat assigiinngitsut
  • Meerartaarnermi sulinngiffeqartarneq pillugu inatsit nutaaq angajoqqaanut, ulloq 1. januaari 2021-imi kingusinnerusukkulluunniit meerartaartunut ulloq 1. januaari 2021-mi atuutilissaaq.
  • Sulisartunut namminersortunut erninermi aningaasaateqarfik ulloq 1. juli 2021-mi aatsaat atuutilissaaq.
Erninermi aningaasaateqarfik nutaaq pillugu paasissutissat annertunerusumik uani atuarneqarsinnaapput.

Meerartaarnermi sulinngiffeqartarneq pillugu inatsit uani atuarneqarsinnaavoq.

Paasisaqarnerunissamut attavigiuk Naalakkersuisoqarfimmi pisortaq Julie Præst Wilche, e-mail: JPRW@nanoq.gl