Sinerissap qanittuani nunap immikkoortuanut 47-mut qaleralittassiissutit aalajangerneqarput

Naalakkersuisut decembarip 10-anni 2020-mi ataatsimiinnerminni aalajangerpaat aqutsiveqarfinnut ukununnga 2021-mi qaleralittassiissutigineqassasut:

Qeqertarsuup Tunuani : 7.847 tonsit,
Uummannami: 9.167 tonsit, aamma
Upernavimmi: 8.134 tonsit.

Naalakkersuisut taamaalillutik nunap immikkoortuanut 47-mut qaleralittassiissutaat 2020-mut sanilliullugit 1.000 tonsinik ikinnerupput, oqinnerupput. Naalakkersuisut qaleralittassiissutigineqartartut ikilisarnissaat pillugit matumuuna ersersinniarlugit saqqummiuppaat Qeqertarsuup Tunuanut, Uummannamut Upernavimmullu qaleralittassiissutigineqartut TAC-at nungusaataanngitsumik ilisimatuussutsikkut innersuussutigineqartunut qanillattornerulluni.

Qeqertarsuup Tunuani, Uummannami Upernavimmilu sinerissap qanittuani qaleralinniarnermi ilisimatuussutsikkut siunnersuinerit ukiunut marlunnut siunnersuutaapput, ukiuni 2021 aamma 2022 pisassat ataatsimut tunniunneqassasut. Siunnersuinermilu innersuussutigineqarpoq 2021-mi pisat 2022-mi sinnerneqassanngitsut:

Qeqertarsuup Tunuani: 4.346 tonsit
Uummannaq: 5.153 tonsit
Upernavik: 5.068 tonsit

Siornamut pisassiiffiusumut, 2019-20, sanilliullugu siunnersuutaasut Qeqertarsuup Tunuani pisassiissutigineqartut 774 tonsinik, Uummannami 647 tonsinik Upernavimmilu 262 tonsinik ikinnerupput, oqinnerupput.

Umiatsiaararsortunut qaammammut pisassiisutit ingerlatsinikkut nakkutigineqassapput Kalaallit Nunaanni Aalisarnermik Akuersissutinik Nakkutilliisoqarfik pisinnaatinneqassalluni aqutsiveqarfinni Qeqertarsuup Tunuani, Uummannami aamma Upernavimmi qaammammut qaleralittassiissutigineqartut tamakkerneqaraangata aalisarnermik unitsitsisinnaanissaminut.

Aalisarnermut, Piniarnermut Nunalerinermullu Naalakkersuisoqarfik suleqatigiissitamik pilersitaqarpoq, taassuma sinerissap qanittuani qaleralinniarnermi ingerlatsineq pillugu nalilersorpaa. Suleqatigiisitap suliani Aalisarneq Pillugu Ataatsimiititaliarsuaq peqatigalugu ataqatigiissaarissaaq. Suleqatigiissitap innersuussusiani 2021-mi naammassissagaa naatsorsuutigineqarpoq.

Attavigineqarsinnaavoq Aalisarnermut, Piniarnermut Nunalernermullu Naalakkersuisoqarfimmi immikkoortortami pisortaq, Birgitte Jacobsen. E-mail: bija@nanoq.gl