Dundas Titanium A/S piiaanissamut akuersissummik tunineqarpoq

Dundas Titanium A/S-p nunatta kitaata avannaani Moriusap eqqaani piffimmi 64 km2-inik annertussuslimmi piiaanissamut akuersissummik tunineqarnissaa Naalakkersuisut ulloq 11. december akueraat. Dundas Titanium A/S aatsitassat atortussiat oqimaatsut piiarnissaannik piginnaatinneqarpoq, tassani nunap qaavani sioqqanit ilmenit aatsitassallu atortussiat oqimaatsut allat titaniumitallit ilanngullugit. Piiaanissamut akuersissut piffissarititaasumiukiuni 30-ni atuuppoq. Peqatigisaanik suliniummut Avatangiisinut Sunniutinik Naliliineq (VVM-mik nassuiaat) kiisalu Inuiaqatigiinnut Piujuaannartitsinermik Naliliineq (VSB-mik nassuiaat) Naalakkersuisut akueraat.

Piiaanissamut akuersissummik tunniussineq Inuussutissarsiornermut Aatsitassanullu Naalakkersuisup Jens-Frederik Nielsenip nuannaarutigaa; ”Dundas Titanium A/S-imut akuersissummik tunniussineq Kalaallit Nunaannut aatsitassarsiorfinnullu ingerlatsisunut iluaqutaasumik pisariitsumik sulianik ingerlatsinermut uppernarsaataavoq. VVM-mik VSB-millu tamanut tusarniaanerup qaammatit pingasuinnaat qaangiuttut naammassineqarneranit maanga killinnerput nuannaarutigisorujussuuarput. Suliniut piffimmi innuttaasunut Kalaallillu Nunaanni tamanut annertuumik periarfissiivoq. Ukioq manna Europa-Kommissionip siullermeerluni titaniumip pingaaruteqarnera pissutigalugu aatsitassatut atortussiatut pingaarutilittut nalunaarsorpaa. Suliniummi titaniumip piujuaannartitsinermik toqqammaveqartumik niuerfinnut anngussinnaanerata Kalaallit Nunaat annertuumik periarfissippaa. ”

Dundas Titanium A/S, Avannaata Kommunia Naalakkersuisullu iluatsittumik suliniummut suleqatigiinnissamut isumaqatigiissut (Impact Benefit Agreement (IBA)) isumaqatiginninniutigaat.

Piiaanissamut akuersissut IBA-lu ulloq 14. december 2020, nal. 10:00 atsiorneqassapput, taannalu ulloq aamma taakku atulernerannik malunnartitsinerussaaq.

Piiaanissamut matusinissamullu kiisalu suliat ingerlannissaannut pilersaarutit suliarineqartussanngorput. Pilersaarutinik taakkunannga suliaqarneq ingerlatseqatigiiffiup Naalakkersuisullu qanimut suleqatigiinnerisigut pissaaq. Piiaanissamut matusinissamullu pilersaarutinik Naalakkersuisunut akuersisitsinissamut ingerlatseqatigiiffik ulloq 31. december 2022-p tungaanut piffissaqarpoq. Ingerlatseqatigiiffik qinnuteqaammik naammaginartumik tunniussisissappat naatsorsuutigineqarpoq piiaanissamut matusinissamullu pilersaarutip akuerinissaanut oqartussat suliarinninnerat annerpaamik qaammatinik arfinilinnik sivisussuseqarumaartoq. Allatut aalajangertoqanngippat, ingerlatseqatigiiffiup aatsitassarsiornini kingusinnerpaamik ulloq 31. december 2025 aallartereersimassavaa.

IBA-mik piiaanissamullu isumaqatigiissutit atsiorneqarniariarunik Aatsitassanut Aqutsisoqarfiup nittartakkakkut qupperneranni www.govmin.gl tamanut takusassiarineqassapput. Piiaanissamut akuersissummut tunngasunik apeqquteqartoqarusuppat, Aatsitassanut Naalakkersuisoqarfimmi pisortaq Jørgen T. Hammeken-Holm oqarasuaatikkut +299 552466 mailikkulluunniit jeoh@nanoq.gl attaveqarfigineqarsinnaavoq.