Piginnaasanik ineriartortitsineq pitsaanerusumik suleqatigiinnissamut tunngaviuvoq

Decembarip ulluisa arfineq-pingajuanni qulingiluaanilu Peqqissutsimut Naligiissitaanermullu Naalakkersuisoq, Anna Wangenheim Peqqinnissaqarfik, Allorfik, Innarluutillit Illersuisoqarfiat Tilioq, Pissassarfik aammalu Qeqqata Kommuniani Atugarissaarnermut Ataatsimiititaliaq pulaarniarlugit Sisimiuniippoq.

Pulaarnissamut siunertaq tassaavoq, suliffeqarfiit assigiinngitsut unammilligassaannik suliniutaannillu paasisimasaqalernissaq aammalu oqartussaaffiit assigiinngitsut akornanni suleqatigiinnerup iluani pitsanngorsaataasinnaasunik periarfissat tusarnissaat.

Peqqinnissaqarfiup nunap immikkoortuani aqutsisoq aammalu kommuni assigiinngitsorpassuarnut, napparsimasunut pitsaanerusumik sullissisarnissamut, sulisunik piginnaasatigut ineriartortitsinermut, sulisunik avitseqatigiinnermut il.il. tunngassuteqartunik suleqatigiinnissamik isumaqatigiissusiornikuupput.

”Innuttaasunik kiffartuussisarnermut tunngatillugu unammilligassanik aaqqiissuteqarnissamut Peqqinnissaqarfiup kommuniullu suleqatigiilluarnerat pitsaalluinnarpoq. Arlalippassuarnut tunngatillugu suli pitsanngorsagassaqartoq illuatungeriit tamarmik oqaatigaat, soorlu assersuutigalugu innuttaasut namminneq peqqissutsimikkut pitsanngorsarnissaannut aammalu inuiaqatigiinni peqqissutsip tungaatigut akisussaaqataanissaannik piorsaanissamut tunngatillugu ikioqatigiinneq. Sorpassuartigut piginnaasanik ineriartortitsinissaq tunngaviussaaq” – taama oqarpoq Anna Wangenheim

Assigiinngitsunik ataatsimeeqateqarnermi oqartussaasut akornanni suleqatigiinnerup pitsanngorsarneqarnissaa arlalinnit kissaatigineqarluni erseqqissarneqarpoq. Assersuutigalugu Allorfiup naartusunut aanngajaarniutinik pinngitsuuisinnaanngitsunut tunngatillugu siusissukkut iliuuseqarnissaq pillugu suleqatigiinnermut aalajangersimanerusumik ingerlatseriaaseqarnissaq kissaatigigaa eqqaaneqarpoq, Tiliup Pissassarfiullu eqqaavaat inunnut innarluutilinnut suliamik suliaqartarneq pitsaanerusariaqaraluartoq, taamaasilluni sukkanerusumik piginnaanngorsaaqqinneqarniassammata, kommunip kissaatigaa, meeqqat tarnimikkut nappaateqartutut pasitsaanneqartut sukkanerusumik qulaajaavigineqartarnissaat, aammalu suni tamani piginnaasanik ineriartortitsinissaq eqqaaneqarpoq, assersuutigalugu inunnut innarluutilinnut aammalu innuttaasunut tarnimikkut nappaatilinnut tapersersortinut.

Qeqqata pinaveersaartitsinermut peqqinnissakkullu siuarsaanermut suliniutaa pillugu Atugarissaarnermut Ataatsimiititaliaq oqaluttuarpoq. Anna Wangemheimip Atugarissaarnermut Ataatsimiititaliap kommunimi pinaveersaartitsinermut timitaliinertalimmik siunnerfeqarnera innuttaasullu anguniagassanut peqataatinnerannut pingaaruteqartumik suliaqarnera aammalu innuttaasut namminneq siunnersuutaannut sukkasuumik atuutsitsilertarnera pillugit nersualaarpaa.

Inalugarsuakkut kræftimik sukkanerusumik misissuisarnissaq februaarimi atuutilersinneqassasoq Anna Wangenheimip ataatsimiititaliamut ilisimatitsissutigaa. Tamanna isumaqarpoq, innuttaasut inaluarsuakkut kræftimik pasitsaanneqartut misissortinniarlutik Nuummukartarnissaat pisariaarutissasoq, aammalu maanna Sisimiuni nunap immikkoortuani napparsimavimmi atortussat inissinneqassasut. Angalasartoqatigiit misissuinerit ingerlattassavaat.

Paasisaqarnerorusukkuit naalakkersuisup allattaa Frederik Siegstad email frsg@nanoq.gl imaluunniit oqarasuaat 34 62 32 aqqutigalugit attavigineqarsinnaavoq.