Aqutsiveqarfiit nutaat atuutilissapput - pisassiiviunngitsut atorunnaassapput

Naalakkersuisut decembarip 10-anni 2020-mi sinerissap qanittuani qaleralinniarneq pillugu Namminersorlutik Oqartussat nalunaarutaat normu 11, 28. august 2014-imeersoq allanngortippaat.

Sinerissap qanittuani qaleralinniarneq pillugu nalunaarutip allanngortinneqarnera tunngavigalugu aqutsiveqarfinnik nutaanik pilersitsisoqassaaq, taakkunani aalisakkanik pisassiisoqartassalluni, sumiiffiillu pisassiiviunngitsutut taaneqartartut atorunnaarsinneqassallutik.

MSC-mik meqqeqartitsinissamik akuersissut annaaneqarsinnaanera aarlerinarsinnaavoq, avataani sumiiffinnut marlunnut kiisalu sinerissap qanittuani sumiiffinni 1B-1F, Aasianniit Kap Farvelimut, TAC-p NAFO-p tamarmiusumik pisassanut innersuussutigineqartut qaangerneqarpata. Avataani Davis Strædemi aamma Baffin Bugtimi qaleralinniarneq MSC-mit meqqeqartitsilluni aalisarneq MSC-mit piumasaqaataammat aqutsinermut pilersaaruteqartoqassasoq.
Nalunaarummi nutarterneqartumi aqutsiveqarfiit tallimat nutaat atuutilissapput, taakkulu tassaapput:

Aqutsiveqarfik Qaanaaq
Aqutsiveqarfik Sisimiut- Maniitsoq
Aqutsiveqarfik Nuuk
Aqutsiveqarfik Paamiut-Qaqortoq
Aqutsiveqarfik Kangia

Aqutsiveqarfiit Upernavik, Uummaannaq aamma Qeqertarsuup Tunua annerusumik allannguuteqassanngillat. Aqutsiveqarfiup Qeqertarsuup Tunuata kujammut killinga kujasinnerulaartumut 68°51’N-miit 68°30’N-mut inissinneqassaaq.

Allannguineq Naalakkersuisooqatigiit isumaqatigiissutaannut naapertuuppoq, isumaqatigiissummi ima allassimasoqarluni:

”Nunatta sineriaa tamarmi aalisarnikkut aqutsiveqarfinnut immikkoortiterneqassaaq, tassanilu sapinngisamik aalisakkat amerlanerpaat pillugit pisassiisoqartassalluni. Uumassusilinnik siunnersuisartut pisassat annertussusaannik innersuussuteqartassapput, tassanilu aqutsiviit nutaat ilanngullugit siunnersuisoqartassaaq.”

Pisassiiviunngitsut atorunnaassapput
Sumiiffiit pisassiiviunngitsutut taaneqartartut atorunnaarsinneqassapput, taakku pillugit siusinnerusukkut paragraf 6-imi allassimapput.

Sumiiffiit ilaasa pisassiiviginagit killeqanngitsumik aalisar¬figineqartarneri akisussaassuseqarnermut nungusaataanngitsumillu aalisarnermut naapertuutin-ngillat. Inuussutissarsiortut kissaatigaat sinerissap qanittuani qaleralinniarneq siunissami MSC-mik meqqilersorneqassasoq, tamannalu sumiiffinni pisassiivigineqanngitsuni aalisarneq akuerineqartillugu MSC-mik meqqilersuititsiniarneq ajornakusuussaaq.

Sumiiffinni pisassiiviunngitsuni atorunnaarsitsineq tingussaasumik ima pisalissaaq, Naalakkersuisut TAC-mik aalajangersugaat aqutsiveqarfinnut Upernavimmut, Uummannamut aamma Qeqertarsuup Tunuanut qaleralittassiissutigineqartunut killiusalissaaq. Akerlianik maannakkut ima pisoqartarpoq pisassiiviunngitsuni killeqanngitsumik qaleralinniartoqartarluni.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi immikkoortortami pisortaq, Emanuel Rosing. E-mail: emro@nanoq.gl