Kalaallit meerartaannut 22-usunut 1951-imi Danmarkiliartinneqarsimasunut utoqqatserneq

Kalaallit meerartaasa 22-usut 1951-imi Danmarkiliartinneqarnerat pillugu oqaluttuarisaanermut tunngasumik qulaajaaneq danskit naalakkersuisuisa Naalakkersuisullu ullumikkut tamanut saqqummiuppaat. Meeqqat pitsaanerusumik inuuneqalernissaat misiliinermi siunertaasimavoq, misiliinerulli ingerlanerani Kalaallit Nunaanni ineriartornermi maligassiuisunngornissaat aamma pineqaleriataarpoq.

Misiliinermut tunuliaqut, tassunga ilanngullugit kina toqqarneqassanersoq, sooq aamma qanoq; meeqqat Danmarkimiinnerminni Nunatsinniinnerminnilu; misiliinerup nalaani meeqqat misigisaat kiisalu inuttut kingunerluuteqarnerat qulaajaanermi ilaatigut allaaserineqarput.

Qulaajaanerup tamanut saqqummiunneqarneranut atatillugu statsministeri Mette Frederiksen ima oqaaseqarpoq:

”Suliaq ukiorpassuarni malinnaavigisimavara, alianartut inuit nalaassimasaat suli killitsissutigisaqaakka. Meeqqat eqqarsaatigineqarnissaat kingulliunneqarsimavoq. Taamaalillutik ilaquttaminnut, qanigisaminnut attaveqarnertik, Kalaallit Nunaannut nunaqqatiminnullu tunngatillugu inuunermi oqaluttuassartaat annaavaat.

Pereersimasut allanngortissinnaanngilavut. Kisianni paarisussaasimagaluakkatsinnut sumiginnarsimasatsinnullu tunngatillugu akisussaaffimmik tigusisinnaavugut utoqqatserfigalugillu.

Maannakkut inuusut arfinillit inuttaat allaffigisimavakka, tassani Danmarki sinnerlugu taakkununnga – ilaannullu - utoqqatserlunga.”


Qulaajaanerup tamanut saqqummiunneqarneranut atatillugu Naalakkersuisut Siulittaasuat Kim Kielsen ima oqarpoq:

”Meeqqat 22-t nalaassimasaat pillugit saqqummiussaq killitsinnareqaara. Immikkut ittumik alliartornerat ilaqutaannut, inuiaqatigiinnut minnerunngitsumillu kalaaliussusaannut atatillugu kingunerluuteqangaatsiarpoq.

Massakkut, ukiut 70-ingajaat sinnerlugit qaangiutereerput, Namminersorlutik Oqartussaqalernikuuvugut, aammalu Danmarkip Nunattalu suleqatigiinnerat ineriartorfiungaatsiarsimavoq. Ullumikkut naligiittut illuatungeriippugut. Oqaluttuarisaanerput kingumut qiviarlugu taamanikkut politikikkut aalajangiinerit kinguneri ataatsimoorluta malugalugillu takusinnaavavut.

Ataatsimut oqaluttuarisaanerput, nuannersortaat alianartortaallu ilinniarfigivagut ilinniarfigiuaannartussaallugillu.”


Allanik oqaaseqaateqarumagaanni Angutinnguaq Tittussen 345604-imut attavigineqarsinnaavoq.

Qulaajaaneq kalaallisuumut nutserneqaleruttorpoq inerniliinera uani atuarneqarsinnaavoq.