Innuttaasunut tusilartunut nutaarsiassatsialak

Nunani tamalaani inunnut innarluutilinnut ulloritinneqartumi inuit innarluuteqartut pisinnaatitaaffiisa, ilaatinneqarnissaasa peqataatinneqarnissaasalu qulakkeerneqarnissaat nunarsuaq tamakkerlugu ukkatarineqartarput.

Inuit innarluutillit tapersersorneqarnissaannut inatsit ulloq 1. januaari 2020 atulersinneqarmat kingornalu atuutsinneqalermat tamanna nunatsinni alloriarneruvoq pingaarutilik. Innuttaasut innarluutillit tapersersorneqarnissamut pisinnaatitaaffii innuttaasullu allat assigalugit inuiaqatigiinni ilaasinnaanerat inatsit aqqutigalugu pitsaanerulersinneqarput.

Innuttaasut akornanni eqqortumik ikiorneqarnissamik ajornartorsiuteqarsimasut tassaapput inuit tusilartut ussersuutaannut oqalutseqarnissamik pisariaqartitsisut.
”Tusilartut ussersuutaannut oqalutsissaqanngippat innuttaasut tusilartut immikkoortinneqaratarsinnaapput. – Nunatsinni innuttaasunut tusilartunut ungasianiit oqaluttaasarnissamut Pissassarfiup isumaqatigiissuteqarfigineqarsimanera nuannaarutigalugu oqaluttuarisinnaavara,” Martha Abelsen, Isumaginninnermut, Ilaqutariinnut Inatsisinillu Atuutsitsinermut Naalakkersuisoq oqarpoq.

Ungasianiit oqaluttaaneq eqaatsumik digitalimillu attaveqaqatigiinnikkut aaqqiissutaavoq, assersuutigalugu smartphone atorlugu tusilartut ussersuutaannut oqalutseqarnissamik periarfissiisoq.

Isumaqatigiissuteqarnikkut assersuutigalugu Peqqinnissaqarfik, pisortani oqartussaasoqarfiit innuttaasullu namminneq ungasianiit oqalutseqarnissamik inniminniisinnaalissapput. Aningaasartuutit oqartussaasumit noqqaasumit akilerneqartassapput, innuttaasullu Inuit innarluutillit tapersersorneqarnissaannut inatsit naapertorlugu ungasianiit oqalutseqarnermut atatillugu aningaasartuutinut qinnuteqarnissamik periarfissaqassallutik.
Pissassarfiup iluarsisassat kingulliit inissitsiterlugit maanna suliarai, aaqqiissutillu 2021-mi ukiup affaani siullermi atorneqarsinnaalernissaa naatsorsuutigalugu.
Aallartisarneranut atatillugu ilitsersuutit Pissassarfiup nittartagaani pissarsiarineqarsinnaalissapput. Aaqqiissutip aallartinnginnerani aaqqiissut pillugu paasissutissiisumik kommunit allagarsiumaarput.

Sulineq 2021-mi nangeqqinneqassaaq, Kalaallit Nunaata inuit innarluutillit pillugit isumaqatigiissummik naammassinninneranik nassuiaammik Naalakkersuisut saqqummiussissallutik.
”Inuit innarluutaat apeqqutaatinnagu nalilimmik inuuneqarsinnaaqqullugit inuit innarluutillit atugaasa pitsanngorsarnissaannik sulinerput ingerlateqqipparput,” Martha Abelsen, Isumaginninnermut, Ilaqutariinnut Inatsisinillu Atuutsitsinermut Naalakkersuisoq oqarpoq.

Paasisaqarnerunissamut attavigineqarsinnaavoq Naalakkersuisumut allatsi Inger Heilmann Larsen, e-mail ihla@nanoq.gl imaluunniit oqa. + 299 554160.