Inuiaqatigiit akisussaaffimmik tigusissapput ilinniagaqartunik - lærlinginik aamma suliffeqarfinni sungiusartunik allanik atorfinititsisarnermikkut

Kissaatiginarpoq uagut nunatut nammineq atorfiit inuttaqanngitsut suliffeqarnermi inuttassarsiuunneqartartut inuttassaqartsittalissagigut. Ukiunimi aggersuni suli maannamiit annertunerujussuarmik sulisussanik sulianut ilinniagaqarsimasunik amigaateqalertussaavugut, inuiaqatigiinni suliassaqarfinni assigiinngitsorpassuarni, - taamaattumik nuannaarutissaavoq Inatsisartut akuersissutigimmassuk inatsit nutaaq, Ilinniartut sungiusartullu atorfinitsinnerini suliffiit pisortanilu oqartussat inuiaqatigiinni akisussaaffeqarnerat pillugu Inatsisartut inatsisaat.

2019-imi ukiumut ilinniartut - lærlingit - 745-iupput, tassalu ukiumut siulianut sanilliullugit 1 %-imik qaffariaateqarlutik, kisiannili ineriartorneq 2012-imiit isiginiaraanni ukiumut lærlingiusartut 205-inik ikileriarsimapput.

Sullissinermut tunngavissanik pitsaanerusunik pilersitsinikkut, aammalu lærlinginut sungiusaammillu suliffeqartartunut allanut suliffissat inuttaqanngitsut ersarissarnerisigut, piukkunnartullu tulluarsarlugit tulleriiaartarnerisigut periarfissanut neqeroorutigineqartunut, siuarsarsinnaavagut suliffissaqarneq aammalu maani nunatsinni piginnaanngorsaaneq. Tamanna kinguneqarsinnaavoq inuusuttut amerlanerusut qinnuteqaatiminni siunnerfilersuisalernissaannik, lærlingitut imaluunniit sungiusaammik suliffeqartutut suliffissanut isumaqatigiissuteqartarnerni.

”Tamatta pilersitseqataavigissavarput nunatsinni inuusuttortatsinnik suliffeqarneq ilinniartitsiviusoq. Suliffeqarfiit, pisortaniittut namminersortullu periarfissaqartut inuusuttortatsinnik ilinniagaqartitsinissamut ilisimasanik taakkuninnga ingerlatitseqataassapput, tamat inuianni iluaqutissaannik”, taama oqaaseqarpoq Suliffeqarnermut, Ilisimatusarnermut Avatangiisinullu Naalakkersuisoq Jess Svane.

Tamatumalu saniatigut aamma pingaaruteqarpoq inuusuttortatta ilisimassagaat lærlinginut sungiussaammillu suliffeqartussanut allanut sungiussaammik suliffissat sumiinneri, nunatsinni sumiluunniit najugaqaraluarunik. Suliffeqarfiit lærlinginut sungiusaammillu sulisussanut allanut suliffissat inuttaqanngitsut suliffissanut quppersakkakkut www.suli.gl allagarsiukkaangatsigit inuusuttortatta ilisimasarpaat sungiusaammik suliffissaminnik ujarlernerminni sumut saaffiginnissanerlutik.

Kisianni tamanna periaatsit sunniuteqartut ilagivaat ataasiinnaq, inuusuttuarartatta inuusuttortattalu kajumissaarneranni piumassuseqarnissamik inuussutissarsiutinut ilinniartitaanerni ilinniagaqarnissamut. Naalakkersuisut sulissutigaat ataatsimut isiginnittumik periaaseqarnissaq, ataqatigiissaarisussamik ilinniartitaanernik, isumaginninnikkut aaqqissuussinernik aamma suliffeqarnermik. Tamanna peqataassaaq inuusuttatta suliffeqalernissamut minnerunngitsumillu ilinniagaqarnissamut piareersimalersinniarnerini.

Inussiarnersumik inuulluaqqusillunga

Jess Svane

Naalakkersuisoqarfimmi pisortamut paasissutissat saaffiginnissutigineqarsinnaapput, Isak Nielsen Kleist, ISIIN@nanoq.gl