Ilinniarnertuunngorniarfinnut tunngavissat pitsaanerusut



Ilinniarnertuunngorniarfinnut inatsisip allanngortinnissaa Inatsisartut amerlanerussuteqarlutik 24. november 2020-mi akueraat. Ilinniarnertuunngorniarfiup pitsaanerulernissaanut Ilinniarnertuunngornianit ilinniartitsisunillu pisariaqarsorineqartut allannguinermut tunngavigineqarput.

Amerlanerusunut tulluartumik eqaannerulersitsineq periarfissaqartitsinerunerlu siunertaapput. Allannguutit tulluarsarneqarput innersuussutini ilinniaartitaanerup aaqqissuussaanera eqaatsoq ataqatigiittorlu, ilinniarfinnik assigiinngitsunik, ilinniarfissanik neqeroorutinik pisariaqartitsinermik tikkuussisoq, Naalakkersuisut suliarisaanik.

Inatsit nutaaq qassiinik pitsanngoriaateqarpoq, soorlu GUX-imik ilinniarnerit assigiinngitsut arlallit periarfissaalissapput. GUX siusinnerusukkut taamaallaat ukiuni pingasuni ingerlanneqarsinnaasimagaluartoq maanna ukiuni marlunni sisamanilu ingerlanneqarsinnaalerpoq. Taamatut periarfissiinikkut ilinniarnertuunngorniat ilinniaqqinnissamut periarfissaqarnerulissapput.

Ukiuni marlunni GUX misiligutaasumik ilinniaqatigiinnit pingasunit ingerlanneqareerpoq, taakku GUX Aasianniipput allallu eGUX-erlutik alisissumit ilinniartinneqartarlutik. Taakku ukiuni marlunni ilinniarnertuunngorniarfiit nalinginnaasumik sivikitsumik akunnattumilluunniit ingerlaqqiffiusumik ilinniarnissamut naleqqussagaanerat assigiissutigaat. Ukiuni sisamani timersornertalimmik ingerlatsineq Kalaallit Nunaanni Timersoqatigiit Kattuffiat aamma Elite Sport Greenland suleqatigalugit GUX Nuummiittoq allannguinermi aallaavigineqarportaaq.

” Nuannaaqaanga ilinniarnertuunngorniat assigiinngitsut amerlanerusut pitsaanerusunik eqaannerusumillu periarfississinnaagatsigit. Ilinniartummi naammassinnittartullu amerlanerunissaat anguniagaraarput. Taamaattumik atuarfiit maaniittut sinaakkutit nutaat iluaqutsiullugit atuartut amerlanerusut ikiorneqarnissaat naammassinninnissaallu qulakkeerinneqataaffigissavaat.” Taama Ilinniartitaanermut, Kultureqarnermut Ilageeqarnermullu Naalakkersuisoq Katti Frederiksen oqarpoq.

Paasisaqarnerorusukkuit Immikkut Siunnersorti Helena Lynge Møller hlmo@nanoq.gl-ikkut attavigiuk