Inuit annertuumik innarluutillit suliffissarsinissamik annertuumik ajornartorsiuteqarput

Inuit annertuumik innarluuteqartut amerlanerpaartaat imminnut pilersornissamut siusinaartumik soraarnerussutisiaqanngikkunik pisortanit ikiorsiissutisisarput. Taakkunannga 75 procentit suliffeqarfeqarfimmiinngillat pisortaniillu pilersuinermut tapiissutisisarlutik. Taamaallaat 25 procentii suliffeqarfeqarfimmut attuumassuteqarput. Paasissutissarpassuit ilai tamakku nalunaarusiami nutaami atuarneqarsinnaapput.

”Suliffeqarfeqarfitta inissaqartitsinerulersinnaaqaat iliuuseqarsinnaasut perusuttullu inissaqartinneqarnissaannut periarfissinneqarsinnaaqqullugit. Suliffeqarfinni inuiaqatigiinni aningaasarsiorneq pillugu inatsimmi nutaami innuttaasunut ajornartorsioqqajaasunut, inuit innarluuteqartut ilanngullugit, suliffeqarnikkut assigiinngitsunik aaqqissuussanik pilersitsivigineqarnissaannut periarfissaqalerpoq. Inuit innarluutillit amerlanerusut suliffeqalernissaannut iliuuseqarniarnermi suliffeqarfiit Nunatsinni Suliffeqarnermut Siunnersuisoqatigiinni peqataatinneqassapput,” Suliffeqarnermut, Ilisimatusarnermut Avatangiisinullu Naalakkersuisoq Jess Svane oqarpoq.

Nalunaarusiami allassimavoq nunatsinni innuttaasut 1.131-it innarluuteqarnertik pissutigalugu pisortanit ikiorsiissutinik 2019-imi tunineqarsimasut, taakkunanngalu 60 procentiisa missaat tarnimikkut innarluuteqarput, imaappoq ersinngitsumik innarluutillit. Inuit taakku soorlu isumakkut nanertisimanermik, sapigaaruttuusinernik tarnikkullu nappaatinik atugaqarput.

”Nalunaarusiaq atorlugu inunnut ajornartorsioqqajaasunut neqeroorutitta siunnerfissiornissaanik kissaateqarnitsinni inuit annertuumik innarluuteqartut pillugit paasissutissanik atorneqarsinnaasunik arlalinnik peqalerpugut. Nalunaarusiaq paasissutissanik pingaarutilinnik aamma imaqarpoq suliassaqarfimmi nassuiaatissamut iliuusissatullu pilersaarutissamut ilanngunneqartussanik,”
Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen oqarpoq.

Nalunaarusiami inuit annertuumik innarluuteqartut qanoq ittuunerannik takutitsisunik aamma takutinneqarpoq, matumani suiaassusaat, isertitaqarnikkut tunngavii, meeqqat ilinniartitaanikkullu inissisimanerat ilanngullugit.

Nalunaarusiaq ”Inuit annertuumik innarluutillit” kommunini tamani innuttaasut innarluuteqartut pillugit arlalinnik paasissutissanik imaqarpoq. Nalunaarusiaq Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfiup Naatsorsueqqissaartarfiullu suleqatigiinnerisigut pilersinneqarpoq.

Nalunaarusiaq uani atuarneqarsinnaavoq.

Paasisaqarnerorusuttut Naalakkersuisup allattaa Inger Heilmann Larsen attavigisinnaavaat, e-mail: ihla@nanoq.gl imaluunniit oqa. + 299 554160.