Ilulissani PI/SPS pillugu avataanit nalilersuisitsineq pitsaasoq

Perorsaanermik Ilinniarfimmi, ulluinnarni PI/SPS-imik taaneqartartumi isumaginninnikkut perorsaanermi ilinniakkat pitsaassusaasa qularnaarnissaannut avataaniit nalilersuisoqarpoq pitsaasumik inerneqartumik. Nalilersuinermi isumaginninnerup iluani immikkut ilinniakkanut suliniutaasut tunngavigineqarput, aamma ulluunerani paaqqinnittarfinni sulisunut ilinniarsimasunut periusissiamik iliuusissatullu pilersaarusiamik aamma tunngaveqarluni.

Nunatsinnit, Savalimmiunit Danmarkimillu peqataasulinnik suleqatigiinnik nalilersuisoqarpoq - nalilersuinerlu nunanit tamalaanit akuerisaasunik periaatsinik tunngaveqarluni. Suleqatigiit nunani arlalinni ilinniarfiit pitsaassusaannik nalilersuinermik misilittagaqartorujussuupput nunallu tamalaat akornanni pitsaassutsinik qulakkeerinninniarnermi najoqqutassat malinnissaannut misilittagaqarluarlutik.

”PI/SPS-ip isumaginninnermi perorsaanerup iluani ilinniartitsinerata nunat tamalaat akornanni pitsaassutsimik malinninnera pillugu tulluusimaarutigeqaara. Ilinniarfik aallartikkamili annertuumik ineriartorsimavoq, PI/SPS-ilu 2012-imi kingullermik nalilersorneqarnerminit pitsaasumik ineriartorsimasoq uppernarsarneqarpoq. PI/SPS-ip taama pitsaatigisumik ilinniarfimmik pilersitsisinnaanera nuannaarutaavoq. Taama Ilinniartitaanermut, Kultureqarnermut Ilageeqarnermullu Naalakkersuisoq Katti Frederiksen oqarpoq.

Nalilersuinermi suleqatigiit pitsaassutsimik malitassiat ilinniarfinnut ingerlariaqqiffiusunut ”Europami malittarisassiat najoqqutassiallu" malinneqarsimapput - Europami tamarmi UNESCO-milu FN-ip ataaniittumi tamanit malitassiassatut akuerisaavoq. Malittarisassiat taakku malinnerisigut PI/SPS-imi ilinniakkat Europami nunarsuullu sinnerani malittarisassianik malinninnerannik kinguneqarpoq.

”Avataanit nalilersuisitsinermut tassunga ilanngussineq annertuumik sulissutigineqarsimavoq. Nalilersuinerup inernera pissangalluta utaqqisimavarput. Taamaammat oqiliallannarlunilu naammagisimaarnarpoq nalilersuineri atuarsinnaagatsigu uatsinnut inernerit pitsaallutillu ataqqiniarneqartut. Nunatsinniinnaanngitsoq, aammali nunarsuup sinnerani ilinniarfinnut taama ittunut pitsaatigalutalu naleqqersuulluarsinnaagatta”. Taama PI/SPS-imi rektor Nuka Kleemann oqaaseqarpoq.

Nalilersuineq pillugu nalunaarusiaq uani atuarneqarsinnaavoq.

Allanik paasissutissanik pisariaqartitsiguit immikkut siunnersorti attavigiuk Carl Egede Bøggild ugguuna cegb@nanoq.gl