HFO atorlugu imaatigut angalanissamut inerteqquteqalernissaq Naalakkersuisunit taperserneqarpoq

FN-ip nunani tamalaani imarsiornermi suliniaqatigiiffia IMO aqqutigalugu 2024-miit Issittumi HFO atorlugu imaatigut angalanissamut inerteqquteqalernissaq Naalakkersuisunit ullumikkut akuerineqarpoq. Umiarsuarnut polarkoden-imik naammassinnittunut inerteqquteqarneq 2029-mi juulimiit atuutilissaaq.

Uulia ikummatissaq kinertoq, ilaatigut sulialinnit Heavy Fuel Oil-imik (HFO) taagorneqartoq nunarsuarmi umiarsuarnut ikummatigineqartartunit mingoqarnerpaavoq mingutsitsinerpaallunilu.
Naalakkersuisut ullumikkut Issittumi HFO atorlugu imaatigut angalanissamut inerteqquteqalernissap aalajangiiffigineqarnissaa akueraat. Inerteqquteqalernerup FN-ip nunani tamalaani imarsiornermut suliniaqatigiiffiata IMO-p ataani 2021-mi atuutsinneqalernissaa naatsorsuutigineqarpoq.

Suliffeqarnermut, Ilisimatusarnermut Avatangiisinullu Naalakkersuisoq Jess Svane HFO atorlugu imaatigut angallannermut assartuussinermullu inerteqquteqalernissamut tapersiinermut atatillugu imatut oqaaseqarpoq:

”- Nuannaarutigeqalugu oqaluttuarisinnaavara, Issittumi umiarsuit HFO-mik atuinerannut nassarnissaannullu inerteqquteqalernissaq taperserneqarmat. Tapersiineq Issittup HFO-mik mingutsinneqarsinnaaneranut illersorniarlugu iliuuseqarnissamut piffissanngortoq nunarsuup sinneranut oqariartuutaavoq nukittooq.”

HFO-mik kuuttoorneq avatangiisinut aningaasaqarnikkullu annertuunik kinguneqarsinnaavoq
Issittup imartaani HFO-mik atuinnginnissamut peqqutaasut pingaarnersaraat, umiarsuit ajutoornerini HFO-mik immami avatangiisinut kuuttoornerup avatangiisinut aningaasaqarnikkullu annertuunik kinguneqarsinnaanera.

Imaq nillertillugu HFO katersoruminaatsorujussuuvoq ilaatigullu ajornarsinnaalluni. Taamaattumik HFO-mik annertunerusumik kuuttoornermi uuliap imaaniiginnarnissaa, imaluunniit sinerissamut unerarsinnaanissaa annertuumik ulorianartorsiorfiuvoq.

Tamatuma saniatigut HFO-p aniatitai akuutissaapput peqqissutsimut annertuumik ajoqusiisinnaasut. Inuit uuliap pujoralaanik ajoqusiisartunik najuussuineranni kræftimik, uummatit taqarsuini nappaatinik, milittoornermik, astmamik, bronkitisimik aammalu pujortartanngitsut pujortartarnermi puaat qerattarnerinik nappaateqalersinnaanerat annertusisarpoq. Tamatuma saniatigut HFO-p paavata pujoralai sermersuup aakkiartorneranik annertusititsisarput.

Umiarsuit amerlanersaannut inerteqquteqarneq 1. juuli 2024-mi atuutilissaaq. Angallatinut polarkoden-imik malinnittunut inerteqquteqarneq 1. juuli 2029-mi atuutilissaaq.

Annertunerusumik paasisaqarusunnermi Ilisimatusarnermut Avatangiisinullu Naalakkersuisoqarfimmi pisortaaneq Mette Skarregaard Pedersen oqarasuaat: 346476 / 529844-mut imaluunniit e-mail: mesp@nanoq.gl imaluunniit pan@nanoq.gl aqqutigalugit attaveqarfigineqassaaq.