Atuarfik pillugu atituumik suleqatiginneq - Qaqisa

CSR Greenland, Nuna Tamakkerlugu Ilitsersuisarfik, Ilinniartitaanermut Aqutsisoqarfik, kommunit tallimat atuarfeqarnermut ingerlatsivii aamma Ilinniartitaanermut, Kultureqarnermut Ilageeqarnermullu Naalakkersuisoqarfik atuarfik ukkataralugu peqatigiinnissamik isumaqatigiissusioqqammerput.

Siunertarineqarpoq atuarfimmi suliniutit pillugit kajumissaarinissaq aamma tapersiinissaq, Qaqisa-millu suliniuteqarneq tunngavigalugu atuarfimmik suleqateqarnerup, ilitsersuisarnerup inuussutissarsiornerullu nukittorsarnissaa. Tamanna peqataassaaq atuartut atuarfimmik nangitsinerminni amerlanernik piginnaasaqalernissaannut ilinniaqqinnissartillu pillugu tunngaveqarluartumik toqqaasinnaanngornissaannut.

Qaqisa siliniutaavoq najukkami suleqatigiinnikkut ukiup atuarfiusup ingerlanerani atuarfimmut inuussutissarsiutinullu suliaqartartoq. Tamanna atuarfinneersut inuussutissarsiutini pitsaanerusumik sungiusarlutik sulisarnissaannut sunniuteqassaaq. Pitsaanerulernerata atuartut ataasiakkat iluaqusissavaat kingusinnersukkullu kinguneqassaaq inuussutissarsiutinik ilinniartitsinernut qinnuteqartut amerlanerulernerannik ungasinnerusorlu isigalugu namminersortut aamma pisortat suliffeqarfiisa ilinniarsimasunik amerlanerusunik sulisussaqalernerannik.

“Suliniutinik meeqqat inuusuttullu ilinniartitaanermi ingerlariaqqinnissaannut kajumissuseqalersitsisussanik ataatsimoorluta tapersersuinissarput, aammattaaq ilinniakkamik toqqaanissaannut tunngavissarissaarnerulernissaat pillugu tapersersuinissarput pingaartuuvoq. Meeqqat inuusuttullu siunissami ilinniagaqarnissaat ataatsimoorluta ilungersorluta qulakkeerniagassaraarput, minnerunngitsumillu suliffeqarfitta siunissami naammattunik ilinniarsimasunik sulisussaqarnissaat aamma qulakkeerniagassaraarput,” Ilinniartitaanermut, Kultureqarnermut Ilageeqarnermullu Naalakkersuisoq, Katti Frederiksen oqarpoq.

Paasissutissanik amerlanerusunik pisariaqartitsiguit attavigisinnaavat suliniummut aqutsisoq, Poul Klitgaard uani: pokl@nanoq.gl