Naalakkersuisup 2020-mi kulturimut aningaasaliissutinik agguaannera kingulleq

Ilinniartitaanermut, Kultureqarnermut Ilageeqarnermullu Naalakkersuisoq 2020-mi qinnuteqaateqartitsinermi kingullermut atatillugu suliniutinut katillugit 1.173.500 koruuninik tapiissutinik agguaassivoq. Aningaasat agguaanneqartut aningaasaliissutinit, ataani pineqartunit, sisamanit agguaanneqarput.

“Naalakkersuisut, tassunga atatillugu eqqumiitsuliortut, piffinni immikkuullarissuni nalimmassarluarlutillu nutaanik eqqarsallaqqissut, nersualaarusuppaat. Ilaatigut takuagut nipilersortartut nittartakkakkut naapeqatigiittarfiit atorlugit meeqqat inersimasullu aliikkusersoraat ulluinnagullu oqinnerulersillugit.” Kultureqarnermut Naalakkersuisunngoqqammersoq Katti Frederiksen oqarpoq.

Ilinniartitaanermut, Kultureqarnermut Ilageeqarnermullu Naalakkersuisoqarfik aamma ilisimatitsissaaq, ukiup sinneranut kulturimik sulialinnut aningaasaliissutit nunguttut 2021-milu aatsaat tunniunneqaqqissinnaalissasut.

Kulturimut aningaasaliissutit
Kulturimut aningaasaliissutinit suliniutinut assigiinngitsunut 6-inut 497.000 koruuninik tunniussisoqarpoq. Taakkunannga taperneqarput Ujarneq Fleischerip meeqqanut inuusat atorlugit isiginnaagassiaa, Naleraq Lightsip qullernik eqqumiitsuliaa illoqarfinni arlalinni ingerlanneqartussaq, Liima Inuikkut angalanerat kiisalu kujataani illoqarfinni assigiinngitsuni assinik saqqummersitsineq.

Aningaasat inunnit ataasiakkaanit, kattuffinnit il.il. suliaminnut suliniutiminnullu atatillugu qinnutigineqarsinnaapput, pingaartumillu aningaasarsiutigalugu eqqumiitsuliortut ingerlataannut suliniutaannullu suliniutinullu allanut eqqumiitsuliornikkut qaffasissusilimmik suliaasunut aningaasat tunniunneqarnerusarput. Tamatuma saniatigut timersoqatigiiffiit peqatigiiffinni aaqqissuussinernut atatillugu eqqumiitsuliortunik suleqateqarnerminni, eqqumiitsuliortut angalanerinut aningaasartuutaasa matussutissaannik tapiissutissanik qinnuteqaateqarsinnaapput.

Filmiliornermik ingerlataqartunut aningaasaliissutit
Filmiliornermik ingerlataqartunut aningaasaliissutinit filmiliornermik pilersaarutinut sisamanut katillugit 672.000 koruuninik tapiissutinik tunniussisoqarpoq. Taakkunannga Kim Leinep atuakkiaa “KALAK”-p filminngortinnissaa aningaasalerneqarluni.

Filmiliornermik ingerlataqartunut aningaasanit kalaallit filmiliornermik pilersaarutaannut tapiissutinik qinnuteqartoqarsinnaavoq, pingaartumik oqaluttualiornernut piviusuliornernullu.

Atuakkat kalaallisoortunut aningaasaliissutit
Atuakkanut kalaallisut allatanik tapiissutaasartunit, suliat marluk katillugit 254.000 koruuninik agguaassiffigineqarput. Tassani Arctic Mediap meeqqanut atuakkiaa “Suna Immikkut Piginnaasaraara?” kiisalu sanaluttartoq Kim Kleist-Eriksen pillugu eqqumiitsuliornermut atuakkiaq aningaasaliiffigineqarlutik.

Qinnuteqartoqarneratigut atuakkanut kalaallisuunut tapiissuteqartoqartarpoq. Taassuma saniatigut atuakkianut kalaallisut nutserneqarsimasunut aningaasanik tapiisoqarsinnaavoq. Qinnuteqaateqartup Kalaallit Nunaanni najugaqartuunissaa tapiissuteqartoqassappat piumasaqaataavoq. Tamatuma saniatigut aningaasaliissutit sammisaqartitsinernut allanut atorneqarsinnaapput, assersuutigalugu atuakkat immiussat saqqummersinneqarnerinut, atuakkialerinermut pikkorissarnerinut allanullu.

Kulturimik sulialinnut aningaasaliissutit
Naalakkersuisut 2020-mi kulturimik sulialinnut aningaasaliissutinut ataavartumik qinnuteqartarnerat, Covid-19-p katerisimaartarnermut killilersuinermit eqqumiitsuliortut eqqugaasut atugarissaartinnerujumallugit, ammaassiffigaat. 2020-mi katillugit 2.442.000 kr. eqqumiitsuliortunut 36-nut qaammammut 22.000 koruuninngorlugit aningaasaliissutigineqarput. Ukiup siulianut sanilliullugu tunniunneqartut marloriaataapput. Aningaasaliiffigitittut ilagaat nipilersortartut piffissami katerisimaartarnermut killilersuinerup nalaani, nutaanik nipilersuusiortut.

Kulturimut sulialinnut aningaasaliissutinut qinnuteqarnissaq tulleq pissaaq 15. Januar 2021. Kulturimut aningaasaliissutit, Atuakkat kalaallisoortunut aningaasaliissutinut kiisalu Filmiliornermik ingerlataqartunut aningaasaliissutinut qinnuteqarneq pissaaq kingusinnerpaamik 1. februar 2021. www.sullissivik.gl –imi annertunerusumik atuarit qinnuteqarnermilu immersugassaq nassaaralugu.

Paasisaqarnerorusukkaanni, attavigineqarsinnaapput:
AC Fuldmægtig Uiloq Mathæussen, toqq. 345741, uilm@nanoq.gl imalt
Kulturimut siunnersorti Mika Lyberth, toqq. 345744, mlyb@nanoq.gl