Meeqqap pisariaqartitai salliutittuarlugit siunissami aaqqissuiniarpugut

Naalagaaffiit Peqatigiit Meeqqanut ullorititaat aamma Naalagaaffiit Peqatigiit Meeqqat pisinnaatitaaffii pillugit Isumaqatigiissutaat (Meeqqat pillugit Isumaqatigiissut) tallimanngornermi 20. novembari 2020-mi nalliuttorsiutigineqassaaq. Ulloq 20. novembari ulluuvortaaq Nakuusap meeqqanik siunnersoqatigiivisa Naalakkersuisunut borgmesterinullu 2020-mi Meeqqat ataatsimeersuarnerannit isumaqatigiissummik tunniussiffissaat.

Naalagaaffiit Peqatigiit Meeqqanut ullorititaannut atatillugu Naalakkersuisut nunatsinni meeqqat aamma Meeqqat pillugit isumaqatigiissummi sulissutigineqartut malinneqarnissaat ukkatariniarpaat. Meeqqanut inuusuttunullu pitsaanerusumik atugaqartitsilernissamik pilersitsinissaq Naalakkersuisunit eqqumaffigineqartorujussuuvoq. Naalakkersuisut meeqqat oqaasissaminnik saqqummiisaqqullugit kaammattorpai. Meeqqat isummaminnik oqaaseqarsinnaapput inersimasullu meeqqat oqaaseqarnissamut saqqummiussisinnaalernissaannik sapiissuseqalersitsillutillu piginnaaneqalersitsisussaapput.

 

Nakuusap 2020-mi Meeqqanik ataatsimeersuartitsineranit meeqqat isumaqatigiissutaannik ullumi Naalakkersuisunut tunniussiniarput. Meeqqanik siunnersuisoqatigiinnit isumaqatigiissummik tigusinissaq Naalakkersuisunit qilanaarineqarpoq meeqqallu kissaataasa sapinngisamik piviusunngortinniarnissaat sulissutiginiarlugu. Meeqqat naatsorsuutigisaasa silarsuaasalu imminnut naapertuuttuunissaat pingaaruteqarpoq, meeqqammi ilorrisimaarniassammata nuannaarlutillu.

 

Meeqqat ulluat ulluuvoq pingaarutilik, ullorlu taanna meerartatta naalaarneqartarnissaannik pisariaqartitaannillu salliutitsisarnissap qanoq pingaaruteqartigineranik akunnitsinni eqqarsalersitsisarpoq. Meerartavut siunissaraavut. Taamaattumik meeqqat kissaataannik aallaaveqarnissarput, meeqqallu isumassorneqarlutik toqqissisimasumillu peroriartornissaannik periarfissiinissarput pingaaruteqarpoq” taamak Isumaginninnermut, Ilaqutariinnut Inatsisinillu Atuutsitsinermut Naalakkersuisoq, Martha Abelsen, oqarpoq.

 

Meeqqat kissaataat malillugit ornittakkanik pilersitsinissaq

Meeqqat Nakuusami meeqqanut siunnersoqatigiivisa angerlarsimassalluni toqqissisimanarunnaaraangat sapaatip akunnerisa naaneranni unnukkut unnuakkullu ornittagassaqalernissartik siusinnerusukkut kissaatiginikuuaat. Kalaallit Nunaanni meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit qallunaallu oqartussaasoqarfiisa assigiinngitsunik suliallit akornanni suleqatigiinneq 2020-2023-mut atatillugu Naalakkersuisut kommunillu 2020-mi ukiakkut meeqqat ornittagassaannik pilersitsiortorput.

 

Meeqqat siumut imaluunniit kommuninut saaffiginneqqaanngikkaluarlutik saaffiginnissinnaapput. Ornittakkat Avannaata Kommuniani, Kommune Qeqertalimmi, Qeqqata Kommuniani Kommune Kujallermilu illoqarfinni ataasiakkaani pilersinneqarput. Kommuneqarfik Sermersuup Nuummi Tasiilamilu meeqqat ornittagassannik januaari 2021 nallertinnagu pilersitsinissani naatsorsuutigaa.

 

 

Naalakkersuisut meeqqat sullippaat

Meeqqat atugassarititaat inuunerisalu ullut tamaasa pitsanngorsarniarlugit Naalakkersuisut ingerlaavartumik sulissuteqarput. Meeqqat atugarliortut sumiginnarneqartartullu pitsaanerpaamik ikiorsinnaajumallugit taamatut atugaqartut siusissukkut paasineqartalernissaat immikkut isiginiarneqarpoq. Meeqqat pisariaqartitaasa salliutinneqartarnissaat tamatumalu kingunerisaanik meeqqat paaqqutarilluarneqalernissaat, atugassarissaarnerulernissaat peqqinnerulernissaallu pillugu kikkunnit tamanit qitiutinneqartunik Naalakkersuisut arlalinnik suliniuteqarput sammisassaqartitsillutillu.

 

Meeqqanik sullissineq eqqarsaatigalugu Naalakkersuisut ilaatigut makkuninnga periusissiorsimapput:

 

  • Kalaallit Nunaanni meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit qallunaallu oqartussaasoqarfiisa assigiinngitsunik suliallit akornanni suleqatigiinneq 2020-2023
  • Ilaqutariinnermut Naalakkersuisut politikkiat 2020-2030
  • Angajoqqaat meeqqanik sumiginnaasarnerat akiorniarlugu nuna tamakkerlugu iliuusissanut pilersaarut 2020-2030
  • Naalakkersuisut innuttaasut peqqinnerulernissaannut pilersaarutaat Inuuneritta III, 2020-2030

 

Naalagaaffiit Peqatigiit Meeqqat pisinnaatitaaffii pillugit Isumaqatigiissutaat

Naalagaaffiit Peqatigiit Meeqqat pisinnaatitaaffii pillugit Isumaqatigiissutaat Naalagaaffiit Peqatigiit 1989-imi ataatsimeersuarnerani akuerineqarpoq. Naalagaaffiit Peqatigiit Meeqqat pisinnaatitaaffii pillugit Isumaqatigiissutaat Kalaallit Nunaata 1993-imi atortussanngortippaa.  Meeqqanut isumaqatigiissut meeqqat tamarmik peqqinnartumik toqqissisimanartumillu peroriartornissaannik, atuariartorsinnaanissaannik, siunissaminnut tunngasunik akuutinneqarnissannik pisussaaffiliivoq soorlu aamma meeqqat atornerlunneqarnissamut assigiinngitsumillu pineqarnissamut illersorneqarnissaannik pisinnaatitaaffeqartut. 

 

Attaveqarfissaq

Sukumiinerusumik paasissutissat pillugit naalakkersuisup allattaa, Inger Heilmann Larsen, attavigiuk, e-mail: ihla@nanoq.gl imaluunniit oqa. + 299 554160