Ukioq manna eqeersimaartut pilluaqquagut

Timimik aalatitsinerunissaq pillugu Paarisap unammisitsinerani ajugaasut toqqarneqaqqammerput. Ukioq manna atuarfik, suliffeqarfik inuiaqatigiinnilu eqeersimaartut novembarip 14-ianni Maligassiuisut Show-imi nersorneqarlutillu nersornaaserneqarput.

Maligassiuisut Show-imi Paarisa, Isumaginninnermut Aqutsisoqarfimmi immikkoortortaqarfiusoq, Kalaallit Nunaanni Timersoqatigiit Kattuffiat aamma Elite Sport Greenland timersornermut peqqissutsimullu tunngatillugu maligassiuisunik aallussilluartunillu, tamatsinnit isumassarsiorfigineqarsinnaasunik, nersornaasiipput. Nersornaasiinermi nipilersornermik, qitinnermik erinarsoqatigiinnermillu aliikkusersuisoqarpoq. Maligassiuisut Show KNR TV-kkut toqqaannartumik aallakaatinneqarpoq, isiginnaartullu angerlarsimaffimminni erinarsornikkut qitinnikkullu timimik aalatitsinissamut ataatsimooqataanissamullu kajumissaarneqarput.

COVID-19 pissutigalugu ukioq manna Maligassiuisut Show nersorneqartunik tikeraartoqarnani unnussiuaartitsinertut matoqqasutut ingerlanneqarpoq. Taamaattumik ukioq manna nersorneqartut, tamarmik Nuup avataani najugallit, unnussiuaartitsinermi najuutinngillat. Immiussinikkulli suliniutitik pillugit oqaluttuaralutikkit nersornaaserneqarnerminnut qujapput, immiussallu unnussiuaartitsinermi takutinneqarput.

Kangaatsiami Qinnguata Atuarfia ukioq manna atuarfittut eqeersimaartutut toqqarneqarpoq
Ukiuni pingasuni kingullerni atuartitsinerni anitsiarnernilu timimik aalatitsisoqarnissaa atuarfimmit pimoorullugu sulissutigineqarsimavoq. Atuarfiup takusinnaavaa atuarnerup nalaani timimik aalatitsineq atuartut atugarissaarnerannik ilinniartinneqarnissaminnullu piumassuseqarnerannik pitsaanerulersitsisartoq.

Atuarfiup eqeersimaartuuniarnermini ilinniartitsisut, angajoqqaat atuartullu akuutinnissaat pingaartissimavaa taamaalillunilu suliniutip amerlasuunit taperserneqarnissaa qulakkeersimallugu.

Qinnguata Atuarfiata takutippaa ataatsimoorluni pimoorussillunilu suliniuteqarnikkut qanoq atuarfittut eqeersimaartunngortoqarsinnaasoq. Atuarnerup nalaani timimik aalatitsineq ataatsimoornermik, ilinniarusussutsimik atuartullu piumassuseqarluarnerannik nukissaqarnerannillu pitsaanerulersitsisarpoq.

Qasigiannguit Katersugaasiviat ukioq manna suliffeqarfittut eqeersimaartutut toqqarneqarpoq
Suliffeqarfimmi illoqarfimmilu timimik aalatitsinerunissaq katersugaasivimmit assut sulissutigineqarpoq. Qasigiannguit Katersugaasiviata sammisassaqartitsinerni inuiaqatigiit akuutinnissaat ukkatarisarlugulu Qasigiannguani innuttaasut tamarmik timikkut isumakkullu peqqissuunissamut periarfissaqarnissaat anguniagarisarpaa.

Inuup timikkut tarnikkullu peqqissusaanik pitsaanerulersitsinissaq siunertaralugu katersugaasivik isumaqarluartunik akuutitsisunillu sammisassaqartitsisarpoq. Sammisassaqartitsinermi kulturitoqaq nalitsinnut naleqqussarsimasoq aallaavigineqartarpoq.

Qasigiannguit Katersugaasiviata takutippaa inuiaqatigiinni akisussaaffimmik pingaartitsinikkut aamma kulturip timimik aalatitsinermut atassuserneratigut suliffeqarfimmi illoqarfimmilu ataatsimoornermik atugarissaarnermillu suliffeqarfik qanoq pitsanngorsaaqataasinnasoq.

Iluliarmiu Abia Ottosen ukioq manna inuiaqatigiinni eqeersimaartutut toqqarneqarpoq
Abia Ottosen pitsaaliuilluni suliaqarnermik nuannarisaqarluni aallussilluartuuvoq . Politiitut sulinermi saniatigut ukiuni 30-ni kingullerni pitsaaliuinermik ukkatarinnilluni kajumissutsimik suliaqarnermik aallussisimavoq. Abia Ottosenip innuttaasut qassinilluunniit ukiullit akuutittarlugillu assigiinngitsorpassuit suleqatigalugit suliniutini naammassisarsimavai.

Abiap meeqqanik inuusuttunillu ineriartortitsinissani pingaarnertut soqutigisaraa. Sammisassaqartitsinernut assigiinngitsunut, assersuutigalugu asimi tammaarsimaarnernut ungasissunullu pisuttuarnernut, nammineq kajumissutsiminik aaqqissuussisarpoq. Meeqqat inuusuttullu inuunerminni inuttut alloriarnissamut immikkut tapersersorneqarnissamik pisariaqartitsisut ilagalugit asimut ungasissumik pisuttuartarpoq.

Abia Ottosenip takutippaa timimik aalatitsinerunissap, ataatsimoornissap inuiaqatigiinnilu atugarissaarnerunissap akuuffigineratigut innuttaasutut qanoq inoqatinut minnerunngitsumillu meeqqanut inuusuttunullu annertuumik sunniuteqartoqarsinnaasoq.

Paarisap nersorneqartut tamaasa pilluaqquai. Paarisa.gl-ikkut ukioq manna eqeersimaartut pillugit immiussat naatsut takusinnaavatit – imaluunniit takoqqissinnaavatit.

Paasisaqarnerujumallutit attavigiuk Paarisami ulluinnarni suliaqarnermik aqutsisoq Kirsten Fencker oqarasuaatikkut +299 34 69 06 imaluunniit e-mailikkut kfen@nanoq.gl