Namminersorlutik Oqartussat ingerlatseqatigiiffiutaanni siulersuisut katitigaanerat pillugu oqaaseqatiga

Tassunga atatillugu Angutit arnallu naligiissitaanissaat pillugu Inatsisartut inatsisaat nr. 3, 29. november 2013-imeersumi aalajangersakkat Namminersorlutik Oqartussat ingerlatseqatigiiffiutaanni 14-iusunit pingasunit naammassineqanngimmata erseqqissaatigissavara.

Ilisimatitsissutigissavara pineqartoq Naalakkersuisunit arajutsisimaneqanngimmat, tassungalu atatillugu erseqqissaatigissallugu Namminersorlutik Oqartussat ingerlatseqatigiiffiutaannik suliaqarnermi ingerlatseqatigiiffiit pikkorissunik piginnaasaqarluartunillu siulersuisoqartuarnissaat Naalakkersuisut qulakkeertussaammassuk.

Siulersuisuni ilaasortassanik aalajangersaasarneq toqqaasarnerlu Naalakkersuisunit isumagineqartarpoq, siulersuisuni ilaasortat sulisut sinniisussaatut toqqarneqarsimasut minillugit, taakkumi sulisunit toqqarneqartarmata suiaassusaat apeqqutaatinnagit. Siulersuisut katitigaaneri ingerlaavartumik nalilersorneqartarput tassunga ilanngullugit siulersuisuni ataasiakkaanni piginnaasat suut amigaatigineqarnersut aammalu siulersuisuni ilaasortat suiaassusaat qanoq isikkoqarnersut. Inatsisit atuuttut malinneqarnissaat Naalakkersuisunit anguniagaallunilu kissaataavoq, tassungali tunngatillugu nassuerutigalugu oqaatigineqassaaq siulersuisut pikkorissut piginnaasaqarluartullu ilaasortaatinniartarnerini piumasaqaatit assigiinngitsut naammassiniartarneri, soorlu uani pisumi, ajornakusoorsinnaasarmata.

Siulersuisuni ilaasortat arnat angutillu amerlaqatigiittarnissaat Naalakkersuisunit ingerlaavartumik sulissutigineqartarpoq. Ajoraluartumilli siulersuisuni ilaasortassatut massakkut piukkunnaateqarsinnaasut toqqarniartarnerini piginnaasat suiaassutsillu agguataarsimaneri aallaavigalugit toqqaaniarsinnaaneq ajornakusoorsinnaasarpoq siulersuisuni ilaasortanngorsinnaanissamut aperineqartut periarfissaat soqutiginninnerallu aamma apeqqutaasarmata.

Namminersorlutik Oqartussat ingerlatseqatigiiffiutaani siulersuisuni ilaasortassanik paasisitsiniaallunilu piukkunnaatilinnik toqqaasarnermi pitsaanerusunik tunngavissaqalerumalluni ingerlatseqatigiiffinnut allatseqarfik suliniutinik assigiinngitsunik suliaqarpoq tassani ilaatigut nittartakkatigut attaveqaqatigiittarfiit qarasaasiallu aqqutigalugit tusagassiisarfiit atornerulersinnaanissaat siunniunneqarsimalluni. Taamaasiornikkut siunertarineqarpoq siulersuisuni ilaasortat assigiinnerusumik katitigaasalernissaat aammalu siulersuisuni ilaasortassanngorsinnaasussanik pitsaanerusumik toqqaasalersinnaanissaq. Ilutigisaanik paasisitsiniaaneq aqqutigalugu periusissanik toqqammaviliisoqassaaq pitsaanerusumik siulersuisussarsiortalernermik kinguneqartussamik taamaasillunilu namminersorlutik Oqartussat ingerlatseqatigiiffiutaani siulersussanik toqqaaniartarnerit pitsanngorsaaffigineqarlutik tassunga ilanngullugu suisaassutsit malillugit ullumikkornit pitsaanersumik toqqaasalernissamut periarfissiisumik.


Naalakkersuisut Siulittaasuat
Kim Kielsen