Kangerlussuup Sisimiullu akornanni aqqusernioriaannaaneq sioqqullugu misissueqqissaarnermik suliaq aallartippoq

Inatsisartut Kangerlussuup Sisimiullu akornanni aqquserngup sanaartornissaa inuiaqatigiit tungaasigut imminut akilersinnaassanersoq pillugu misissuinissamut 2020-mi 5 mio. kr.-nik immikkoortitsisimapput. Qeqqata Kommunia aningaasat taakku amerlaqataannik immikkoortitsivoq.

Suliniutigineqartussamut atatillugu tuluit siunnersuisarfiat arlaannaanulluunniit attuumassuteqanngitsoq, Oxford Global Projects, aqquserniornissamut naatsorsuisussatut misissueqqissaartussatullu toqqarneqarpoq. Siunnersuisarfik attaveqaatinut suliniutissat nalilersortarneranni suliatigut immikkut ilisimasaqarnermigut nunani tamalaani ataqqisaavoq.

Suliassamut siunnersuisarfimmik arlaannaanulluunniit attuumassuteqanngitsumik toqqaanikkut naatsorsuinerit tatiginartuunissaat, suliassamullu ilisimasalimmit suliarineqarsinnaanissaat qulakkeerneqassaaq.

Siunnersuisarfiup sulinissaanut suleqatigiissitaq Aningaasaqarnermut Naalakkersuisoqarfimmit, Ineqarnermut Attaveqaqatigiinnermullu Naalakkersuisoqarfimmit, Inuussutissarsiornermut Suliffeqarnermullu Naalakkersuisoqarfimmit, Qeqqata Kommunianit sinniisuutitaqarfiusoq ikiuutissaaq, najukkamilu inuussutissarsiornermut soqutigisallit Arctic Business Circlemit sinniisuutitaqartut aamma ikiuutissallutik.

Misissueqqissaarneq immini 2021-p aallartinnerani naammassineqartussatut naatsorsuutigineqarpoq, kingornalu aqquserniornissamut suliassaq inaarutaasumik aalajangiinermut ilanngunneqassalluni..


Inussiarnersumik inuulluaqqusilluta

Vittus Qujaukitsoq, Aningaasaqarnermut Nalaakkersuisoq
Karl Frederik Danielsen, Ineqarnermut Attaveqaqatigiinnermullu Naalakkersuisoq
Jens-Frederik Nielsen, Inuussutissarsiornermut Suliffeqarnermullu Naalakkersuisoq
Malik Berthelsen, Qeqqata Kommuniani borgmesteri


Annertunerusumik paasisaqarusunnermi saaffigineqarsinnaavoq: Niels Kristian Skou (Aningaasaqarnermut Naalakkersuisoqarfik) nisk@nanoq.gl