Aqqalu Jerimiassenip piumasaqaatit pinngitsoorneqarsinnaanngitsut isumaa paasinerluppaa

Ippassaq 2021-mut Aningaasanut Inatsisissatut Siunnersuutip pingajussaaneerneqarnerata kinguartinneqarnissaa pillugu oqallinnermi (imm. 101), Atassutip siulittaasuata Aqqalu Jerimiassenip ataani atsiortunga, Inatsisartut ataatsimiittarfianni tusarnaartunut aappaagu Aningaasanut inatsisissap maanna isumaqatiginninniutigineqarneranni Atassutip peqataaniarunnaarneranik nassuiaaninni sallunerarpaanga.

Atassutip Inatsisartuni ilaasortaatitaata oqarnera naapertorlugu, taanna ataatsimiinneq sioqqullugu, ataatsimiinnermi ataatsimiinnerulluunniit kingorna Atassut aningaasanik inatsisissamik isumaqatiginninniarnerni peqataajunnaarniarluni pilersaaruteqarsimanngilaq.

Ataatsimiinnermi Aqqalu Jeremiasseni suliassaqarfiit amerlasuuni piumasaqaatit pinngitsoorneqarsinnaanngitsunik saqqummiussivoq. Kingorna arlaleriarlunga aperivara, piumasaqaatai pinngitsoorneqarsinnaannginnersut, aammalu eqaatsumik iliuuseqarsinnaannginnersoq, tamannali itigarpaa.

Partiimi Aningaasanik inatsimmik isumaqatiginninniarluni ataatsimiinnerni annertuunik piumasaqaatit pinngitsoorneqarsinnaanngitsunik Naalakkersuisut isumaqatiginngisaannik naammassisinnaanngisaannilluunniit saqqummiussippat, taava – soorunami – isumaqatiginninniarnissat nanginnissaat tunngavissaarutissaaq. Tamatumalu partiimik pineqartumik isumaqatiginninniarnerit unitsinneqarnerat pissusissamisoortumik kingunerissavaa.

Atassutip siulittaasua aningaasanut inatsisissamut sunniuteqarumanerluni imminut aperisariaqarpoq. Piumasaqaatinik pinngitsoorneqarsinnaanngitsunik isummani qimassaguniuk, taava oqaloqatiginninnissamut suli piareersimavunga.

Vittus Qujaukitsoq, Aningaasaqarnermut Naalakkersuisoq