Vittus Qujaukitsup Nuummi Peqatigiinniat sinniisaat naapippai

Ataasinngornermi ulloq 12. oktober nunarsuaq tamakkerlugu ”Angerlarsimaffeqanngitsut ulluat/Nunarsuaq tamakkerlugu piitsut ulluat” nalliussineqarpoq – ulloq piitsut/angerlarsimaffeqanngitsut ulluinnarni ajornartorsiutinik misigisartagaannik sammisaqarfik.

 

Kalaallit Nunatsinni nammineq piumassutsimik peqatigiiffiit arlallit ullut tamaasa nunatsinni innuttaaqatigiit atugarliortut ikiorniarlugit annertoorujussuarmik suliaqartarput. Taakkununngalu peqatigiiffik Peqatigiinniat ilaavoq, taakku atugarliortut/angerlarsimaffeqanngitsut nerisassanik, oqqiffissamik katerisimaartitsinernillu ikiortarpaat, taamaalillutik taakku ulluinnarni atugaat oqinnerulersittarlugu.

 

Ullormi tassani, ulloq 12. oktober, Aningaasaqarnermut Naalakkersuisup, peqatigiiffimmut pineqartumut ullut tamaasa nalissaqanngitsumik annertuumik atugarliortunut/angerlarsimaffeqanngitsunut ikiuiniarnerannut qujassutitut, peqatigiiffiup sinnissaanut 5.000 kr.-t tunniuppai.

 

”Ajoraluartumik nunatsinni atugarliortunik angerlarsimaffeqanngitsunillu ullut tamaasa ulluinnarminni inuuniapiloortunik inoqarpoq. Taakkulu ilaatigut ikiuiniaqatigiiffiup Nuummi Peqatigiinniat tunniussinnaasaannik pinngitsuuisinnaanngilluinnarput”, Aningaasaqarnermut Naalakkersuisoq Vittus Qujaukitsoq Nuummi Peqatigiinnianut aningaasanik tunisinerminut tunngavilersuuteqarluni oqarpoq, nangipporlu:

 

Piffissami Covid-19-ip atuuffiani inooqatigiinnitsinni sammisanik sapinngisamik annertunerpaamik annikillisaanitta nalaani, inuiaqatigiit akornanni atugarliortortatta puigunnginnissaat pingaaruteqartorujussuuvoq, taakumi aamma naapitaqartarnissartik sammineqartarnissartillu pisariaqartippaat. Tassunga atatillugu Nuummi Peqatigiinniat atugarliortunut taakkununnga annertuumik nuannaartitsisarput, tamannalu annertoorujussuarmik qujamasuutigaarput”.

 

Aningaasanik tapiissuteqarnermut qujaniarlutik Nuummi Peqatigiinniat sinnissaat ippassaq Aningaasaqarnermut Naalakkersuisup allaffianukarput. Takkuttullu tassaapput Magnus Larsen, provsti soraarneq, ilinniartitsisoq atuakkanillu saqqummersitsisartoq, Dorte Larsen, aningaaserisoq, Martin Mader, Frelsens Hærimi ulluinnarni aqutsisoq kiisalu Hans Ludvig Zeeb, angerlarsimaffeqanngitsoq. Naapeqatigiinnermit assilisaq ilanngunneqarpoq.

 

 

Peqatigiinniat pingaartitaat tassaapput ”qanilaassuseq”, ”ataatsimoorneq” kiisalu ”inunnut allanut iluaqutsiineq”.

 

Attaveqarfissaq:

 

Martin Christiansen (Aningaasaqarnermut Naalakkersuisoqarfik)

Toqq: 345213

MCHR@nanoq.gl