Nationalbankenimit misissueqqissaarneq nutaaq Naalakkersuisut aningaasaqarnermut politikianut tapersiivoq

Danmarkimi Nationalbankip Kalaallit Nunaata aningaasaqarnera pillugu ukiumut misissueqqissaarnera saqqummersinneqarpoq. Tupinnanngitsumik bankip aningaaserisui 2020 Covid-19-virusimit sunnerneqarnera ilaavoq. Virusi aningaasaqarnitsinnut, ingammik takornariaqarnermut, ajortumik sunniuteqarpoq. Sunniutip kinguneraa Kalaallit Nunaata aningaasaqarnikkut ineriartornera 2020-mi 2016-imit 2019-imut sanilliullugu unittoorneranik.

Aalisakkat akii siunissaq qanittumi qanoq ineriartussanersut nalornineqarput. Nationalbanki naapertorlugu aalisartut nammineq oqaatigaat, 2021-mi aalisakkat qaleruallillu akii 20 procenti tungaanut appassasut. Tamanna eqqorpat, taava pisuussutinit iluanaarutinut akileraarut (aalisakkanut qalerualinnullu akileraarut) 2021-mi 150 mio. kr.-nik appassaaq. Isertitaqarnikkut annaasaqarnerujussuaq, aamma isertitat aamma ingerlatseqatigiiffiit akileraarutaanut appaanermik kinguneqassasoq.

Nationalbankip aamma oqaatigaa, siunissami utoqqaat inuusuttunit amerlanerulissasut. T.i. utoqqaat amerlanerit – aamma sulisinnaallutik ukioqartut skatimut akileraarusiisartut ikinnerit. Tamanna kingunerissavaa, pisortat aningaasartuutai 5-6 procenti missaanik ukiumut qaffattassasut. Ukiut qulikkaartut marluk qaangiuppata ukiumut 1 milliard kr.-nik amigartoornermik kinguneqassaaq.

”Naalakkersuisut Nationalbankip inerniliineranut isumaqataapput. Bankip misissueqqissaarnera siunissami aningaasaqarnitsinnut aamma periarfissatut ilusiliatsinnut siulittuutigilluarpoq”, Vittus Qujaukitsoq, Aningaasaqarnermut Naalakkersuisoq nassuiaavoq, aamma erserseqqillugu, Nationalbankip aamma Aningaasaqarnermut Siunnersuisoqatigiit siunnersuinerattut 2021-mi aningaasanut inatsisiliortariaqartugut, aningaasatigut ajornartorsiutinut aallussisumik. Nangillunilu:

”Sap. Ak. tulliuttuni 2021-mi aningaasanut inatsimmut isumaqatigiissut inaarsassavarput, Naalakkersuisullu isumaqatigiissummik ukiut sisamat ingerlanerani pisortat aningaasaqarneranik oqimaaqatigiissitsisumik aamma inuiaqatigiitsinnut iluaqusiisumik suliaqarput.”.

2021-mut aningaasanut inatsimmut isumaqatigiissut 27. november 2020-mi pingajussaaneerneqarnissaa naatsorsuutigineqarpoq.

Vittus Qujaukitsoq, Aningaasaqarnermut Naalakkersuisoq/ Naalakkersuisoq for Finanser