Timersornermut peqqissutsimullu tunngatillugu maligassiuisunik nersuineq

Paarisap, Kalaallit Nunaanni Timersoqatigiit Kattuffiata aamma Elite Sport Greenlandip timersornermut peqqissutsimullu tunngtillugu aallussilluartut maligassiuisullu novembarip 14-ianni Katuami Maligassiuisut Show 2020-mi nersussavaat.

Maligassiuisut Show-imi timersornermut peqqissutsimullu tunngatillugu sunniuteqarluartartut tamatsinnillu isumassarsiorfigineqarsinnaasut malunnartinniarneqartarlutillu nalliussineqartarlutillu nersorneqartarput. Ukiut arfinilissaat taamatut unnussiuaartitsisoqassaaq.

Arfininngorpat nal. 20.00 Laali Berthelsen aamma Hans Peter Poulsen Katuami unnussiuaartitsinermut tikilluaqqusissapput. Covid-19 pissutigalugu killilersuisoqarmat ukioq manna unnussiuaartitsineq matoqqasumik ingerlanneqassaaq. Unnussiuaartitsinerli KNR-ikkut toqqaannartumik aallakaatinneqassammat nersuineq aliikkusersuinerlu kikkut tamarmik peqataaffigisinnaavaat.

Pisarnertut unnummi tassani arlalinnik nersornaasiisoqassaaq; Isumaginninnermut Aqutsisoqarfiup immikkoortortaata Paarisap, suliffeqarfik inuiaqatigiinnilu eqeersimaartut nersornaasissavai.

Faxe Kondi suleqatigalugu Kalaallit Nunaanni Timersoqatigiit Kattuffiat Ukioq Manna Timersullammammut, Ukioq Manna Sungiusaasuullammammut Ukiorlu Manna Aqutsisuullammammut aningaasanik tunisissaaq. Tamatuma saniatigut ukioq manna immikkut sulilluarneq pillugu immikkut nersornaasiisoqassaaq.

Grønlandsbanken, Telepost aamma Sparinvest suleqatigalugit Elite Sport Greenland Ukioq Manna Timersornermi Takutitsilluarnerpaamik Ukiorlu Manna Piukkunnaatilinnik Ineriartortitsilluarnerpaamik nersornaasiissaaq.

Nersornaasiinermi ilaatigut Nina Kreutzmann Jørgensen, Frederik Elsner aamma Maalia aliikkusersuissapput, erinarsoqatigiittoqassaaq, sammisassaqartitsisoqassaaq assigiinngitsorpassuarnillu pisoqassalluni. Pisarnertut isiginnaartut tupaallatitsinerit arlallit qilanaarisinnaassavaat, taamaattumik KNR-p Katuami Maligassiuisut Show 2020-imit arfininngorneq novembarip 14-anni nal. 20.00 – 22.00 toqqaannartumik aallakaatitsinerani isiginnaaqataagit.

Paasisaqarnerujumallutit attavigikkit:

Paarisa: Ulluinnarni sulinermik aqutsisoq Kirsten Fencker, oqarasuaatikkut 34 69 06 imaluunniit kfen@nanoq.gl

Kalaallit Nunaanni Timersoqatigiit Kattuffiat: Pilersaarusiornermik siunnersorti Poul Petersen oqarasuaatikkut 34 81 53 imaluunniit poul@gif.gl

Elite Sport Greenland: Elitekonsulent Muusaarannguaq Ostermann-Søholm oqarasuaatikkut 34 81 52 imaluunniit muusa@elitesport.gl