Aasianni tunillatsittoq nutaaq

Ullumi Aasianni COVID-19-imik tunillatsissimasoq nutaaq paasineqarpoq, Pineqartoq Danmarkimiit tikissimavoq, nunatsinnilu nakorsaanerup tunillanneqarsimasoq angerlarsimaannartussaatitaanerminik malinnissimasoq nalunaarutigaa.

Inuk malunniuteqanngilaq, tunillatsissimaneralu tikinnerminiit ullut tallimassaanni misissorteqqinnerani paasineqarpoq.

Piffissap sivikitsup ingerlanerani tunillatsissimasunik pingasunik nassaarpugut. Maanna Kalaallit Nunaanni tunillaassueriaannaaneq ersarissorujussuanngorpoq. Tamanna tupinnanngitsumik maanna Danmarkimi tuniluuttoqarnerata kinguneraa.

Kalaallit Nunaanni tuniluuttoqannginnissaa anguniarneqassappat, angerlarsimaannarnissamut aalajangersakkat tamarmik malinneqarnissaat pingaaruteqarluinnarpoq. Tikittut tamarmik sivikinnerpaamik ulluni tallimani angerlarsimaannassapput, aatsaallu misissorteqqinnermi tunillanneqarsimannginneq akissutigineqarpat anisassallutik. Piffissami angerlarsimaannarfiusumi tikittut allanit qanillineqannginnissaat pingaaruteqarluinnarpoq.

Oqartussaasut aammaloorlutik kaammattuutigissavaat, peqqissutsimut innersuussutit tamanut atuuttut tamarmik malinneqarnissaat kikkut tamarmik peqataaffigissagaat.

-          Qanillinaveersaarit

-          Assammiinaveersaarit eqitaarinaveersaarillu

-          Assannut quersornak

-          Assatit errortorluartakkit

-          Napparsimaguit angerlarsimaannarit aammalu malunniuteqaruit COVID-19-imut  misissortigit

 

 

Tallimanngorneq novembarip 13-ani tusagassiortunut ataatsimiisitsisoqassaaq, piffissaa kingusinnerusukkut nalunaarutigineqarumaarpoq.

Paasisaqarnerorusukkuit uunga saaffiginnissinnaavutit: Henrik L. Hansen henh@nanoq.gl, oqarasuaat: 345191