Aalisarneq pillugu isumaqatigiissumik atsioqatigiineq

Aalisarneq pillugu pisortatigoortumik Kunngeqarfik Tuluit Nunaat aamma Irlandip Avannaa suleqatigiinnissamik isumaqatigiissumik atsioqatigineqarput

Aalisarnermut, Piniarnermut Nunalerinermullu Naalakkersuisoq Jens Immanuelsen Kunngeqarfimmik Tuluit Nunaannik aamma Irlandip Avannaanik aalisarneq pillugu aamma aalisarnermut tunngasunik annerusumik suleqatigiissuteqassallutik Paaseqatigiinnissamik isumaqatigiissummik ullumi novembarip 9-anni 2020-mi atsioqatigiipput.

”Tulluussimaarutigaara Kalaallit Nunaat Tuluit Nunaannik Paaseqatigiinnissamik isumaqatigiissuteqarluni ullumi atsiorsinnaammat aalisarnerlu pillugu ingerlatsinerup ineriartortinneqarnissaanut suleqataanissamut qilanaarpunga, aamma ilisimatusarnermut. Neriuutigivaralu aamma aalisarnermik inuussutissarsiornerup ineriartortinneqarnissaa, isumaqatigiissutip tamanna periarfissimmagu. Kalaallit Nunaata Tuluit Nunaannik ullumi atsioqateqarnera pitsaalluinnartumik suleqatigiilluarnissamut alloriarneruvoq”, Naalakkersuisoq nalliuttorsiorpalaartumik atsioqatigeereernerup kingorna oqarpoq.

Naalakkersuisup Jens Immanuelsenip pisortatigoortumik atsioqataa tassaavoq Tuluit Nunaanni Avatangiisunut, Aalisarnermut aamma Nunami pissutsinut ministeriullunilu allatsip tullia, Victoria Prentis.

Allatsip tullia Prentis atsioqatigiinneq pillugu ima oqarpoq: “Tuluit Nunaat aamma Kalaallit Nunaat nunaapput oqaluttuarisaanermut tamarmik tulluussimaaruteqartut, nunanut tamalaanut suleqateqarsinnaasut, nunat taakku imartaasa uumasuinik pisuussuteqarluartut. Kalaallit Nunaat qutsaveqarfigerusuppara isumaqatiginninniarnermi inerititaqarusussuseqarluni pissuseqarmat. Nammineerluta nunatut sinerialittut kingumut nammineeriartuaarnitsinni anguniarparput nunat Atlantikup Avannaani sanilerisavut suleqatigissallugit, soorlu Kalaallit Nunaat, aalisakkanik suliffissuaqarnitsinnut imammamilu avatangiisitsinnut iluaqutaasumik.”

Isumaqatigiissutigineqartoq Kalaallit Nunaat aamma Kunngeqarfik Tuluit Nunaat aalisarneq pillugu isumaqatigiissuteqartarnissaannut, taassumalu ineriartortinneqarsinnaasaanut tunngaviliivoq. Naatsorsuutigineqartumik Kunngeqarfik Tuluit Nunaat EU-mit januaarip aallaqqaataani 2021-mi ilaasortaajunnaariarpat ukiut tamaasa aalisakkat pillugit ataatsimiittarnissamut tunngaviliivoq, nunat ataatsimeeqatigiittarsinnaallutik suleqatigiinnertillu nukittuunngortissinnaallugu, soorlu aamma aalisakkat pillugit aqutsinermut, nakkutilliinermut, ilisimatusarnermut, isumassarsianut nutaanut aamma aalisarnermik suliaqartut suleqatigiinnissaannut.

Kunngeqarfik Tuluit Nunaat aamma Irlandip Avannaata Kalaallit Nunaatalu naalakkersuisuisa Paaseqatigiinnissamik aalisarneq pillugu, tamatumunngalu tunngasut pillugit suleqatigiinnerulernissamik isumaqatigiissutaat linkimi, uani atuarneqarsinnaavoq.

Annerusumik paasisaqarusuttut Aalisarnermut, Piniarnermut Nunalerinermullu Naalakkersuisoqarfimmi siunnersortaaneq, Katrine Kærgaard, attavigineqarsinnaavoq.Tlf.: 34 53 65, e-mail: katk@nanoq.gl