Nualluummut akiuussutissamik kapitipallagit

Siornatigut nalunaarutigineqareersutut ukioq manna Covid-19-ip tuniluunnera peqqutigalugu nualluummut akiuussutissanik amerlanerusunut kapuinissaq neqeroorutigineqarpoq. Nualluummut akiuussutissamik kapuinissamut neqerooruteqarnermi 1. decembarip tungaanut inuit 65-ileereersimasut, inuit iluarsisinnaanngitsunik nappaatillit, naartusut kiisalu peqqinnissaqarfinni paaqqinnittarfinnilu sulisut salliutinneqassapput, tamatumalu kingorna akiuussutissamik kapuineq inunnut allanut soqutiginnittunullu ammaanneqassaaq.

Peqqinnissaqarfik maannamut kapuutinik 4.500-nik pinikuuvoq, taakkulu nunap immikkoortuinut tamanut nassiussuunneqarnikuupput. Kingusinnerusukkut 2000-inik pissarseqqissaagut, taakkulu nuna tamakkerlugu agguaanneqassapput. Nualluummut akiuussutissamik kapitinnissaq innuttaasunut aalajangersimasunut pneumokok-imut akiuussutissamut kapitinnissamut ilagitillugu neqeroorutigineqassaaq. Innuttaasut taakku tassaapput 65-inik amerlanerusunillu ukiullit, kiisalu innuttaasut iluarsineqarsinnaanngitsunik nappaatillit.

2020-mi ukiakkut nualluummut akiuussutissanik kapuinermi salliutinneqartussat
Ukioq manna akiuussutissanik kapitittussat amerlangaatsiarmata, sumiiffinni kapuiffiusuni kikkut siulliullutik akiuussutissamik kapitinnissamut neqeroorfigineqassanersut tulleriiaarisoqassaaq.

Tulleriiaarinerit matuma kinguliani tabelimi takuneqarsinnaapput. Innuttaasunit siunnerfiusut ataasiakkaat qanoq ilinerani akiuussutissamik kapitissanersut najukkani nalunaarutigineqartassapput.

Tulleriiaarineq           
 Innuttaasuni siunnerfiusut tulleriiarneqarneri
 1  65-ilereersimasut tamarmik
 2  Innuttaasut 65-it inorlugit ukiullit aaqqinneqarsinnaanngitsunik nappaatillit
 3  Pualarujussuartut (BMI > 40 aallaavigalugu)
 4  2. aamma 3. trimesterimi naartusut
 5  Peqqinnissaqarfimmi sulisut, inunnik immikkut ulorianartorsiortunik qanitallit
 6  Kommunini sulisut, inunnik immikkut ulorianartorsiortunik qanitallit (utoqqaat angersarsimaffii, angerlarsimaffinni ikiortit)
 7  Sullivinni toqqartorneqartuni sulisut (sulisitsisunit akilerneqartut)
 8  Inuinnaat (nammineerlutik akiliisut)

Imm. 2-mi aaqqinneqarsinnaanngitsunik nappaatillit taaneqartut tassaapput:
  • Aaqqinneqarsinnaanngitsunik pualluutillit
  • Uummatimikkut taqqamikkullu nappaatillit (aap naqitsineranik qaffasittoortut ilaatinneqanngillat)
  • Diabetes 1-imik imaluunniit 2-mik
  • Inunnguutsiminnik imaluunniit pigilersimasaminnik timip akiuussinnaassusiatigut ajoqutillit
  • Nukillaarneq peqqutigalugu anersaartorniarnermikkut ajoqutillit
  • Aaqqinneqarsinnaanngitsunik tingulluutillit tartuluutillillu
  • Nappaatit aaqqinneqarsinnaanngitsut allat, nuallunnermi napparsimarujussuarnermik nassataqarsinnaasut
Kikkulluunniit, ukioq manna nualluummut akiuussutissamik kapuinermi innuttaasuni siunnerfiusuni ataatsimi amerlanerusuniluunniit akuusut akiuussutissamik kapiteqqullugit annertuumik kaammattorneqarput. Suliniut manna suliniuterpassuit Covid-19-ip nunarsuarmi tuniluunnerani Kalaallit Nunaata pitsaanerpaamik aniguinissaa anguniarlugu ingerlanneqartut ilagaat.

Naartusunut ilummoornermut akiuussutissat
Aamma 3. trimesterimi naartusunut ilummoornermut akiuussutissamik akeqanngitsumik kapitittoqarnissaa neqeroorutigineqarpoq. Ilummoornermut akiuussutissami naartuup inunngornermi kingorna qaammatini tulliuttuni, tassalu meeqqap nammineerluni kapitissinnaalernissaata tungaanut ilummoornermut illersorneqarnissaa siunertarineqarpoq. Tamanna meeraaqqanik napparsimmavinnut unitsitsinnginnissamut pinaveersaartitsisinnaavoq.

Annertunerusumik paasisaqarusunnermi nakorsaaneq Henrik L Hansen, tlf. 553561-imut attaveqarfigineqarsinnaavoq.