Isumaginninnermik suliaqartunut ilinniarnissamik neqeroorutit pitsaasut marluk

Oqartussaasuni isumaginninnermut tunngasuni sullissisunut Perorsaanermik Ilinniarfik ilinniarfissanik marlunnik 2021-mi aallartitsissapput. Kommunini innuttaasut sullinneqarnerisa pitsanngorsarnissaannut naalakkersuinikkut anguniagaqarnermut ilinniartitaanerit tapersiissapput.

Perorsaanermik Ilinniarfiup (SPS) isumaginninnermik sullissisunut – siunnersuinermi ikiortitut aamma ilinniagartuutut ilinniagaqarluni isumaginninnerup iluani siunnersortitut – ilinniarfissanik marlunnik nutaanik 2021-mi neqerooruteqarniarluni aalajangersimanera Isumaginninnermut, Ilaqutariinnut Inatsisinillu Atuutsitsinermut Naalakkersuisup Martha Abelsen kiisalu Ilinniatitaanermut, Kultureqarnermut Ilageeqarnermullu Naalakkersuisup Katti Frederiksen naammagisimaarluarpaat.

”Sulisut suliatigut pisinnaasaasa piginnaasaasalu pitsanngorsarnissaannut amerlanerusunik eqaannerusunillu periarfissaqalernissaq kommunenut iluaqutaasorujussuussaaq. Ilinniarfissat sullissinerit pitsanngorsarnissaannut tapersiinerisa saniatigut isumaginninnermut tunngasuni suliassanut pisariugajuttunut isumaginnilluarsinnaanerulernertik pissutigalugu kommunini sullissisut suliffimminni atugarisaasa pitsaanerulernerannik nassataqarumaartoq qularinngilara. Ukiumi siullermi ilinniartut malinnaaviginissaat qilanaaraara,”
Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen oqarpoq.

Kommunini sullissisunut ilinniarfiit taakku marluk sammitinneqartut angajoqqaat meeqqaminnik sumiginnaasarnerat akiorniarlugu Naalakkersuisut 2020-2030-mut iliuusissatut pilersaarutaannut tapersiivoq, ilaatigut kommunini sullissineq pitsanngorsarniarlugu isumaginninnermi sulisut ilinniarteqqillugillu ingerlaqqittumik ilinniagaqarnissaat ukkatarineqarluni.

SPS-ip ilinniarfissanik marlunnik eqaatsunik neqerooruteqalernermigut, sulisut piffissami sivisuumi amigaatiginngikkaluarlugit ilinniagaqarnissaannik kommunip neqerooruteqarsinnaalernera eqqarsaatigineqarsimavoq. Tamannami ajornartorsiutaasinnaavoq sulisussaqarniarneq killeqaraangat. Ilinniarfissat ullup affaanik ilinniarfiupput, modulillu arlallit ilinniartut sumi najugaqarnerat isiginiarlugu SPS-ip sineriammi immikkoortortaanni ingerlanneqassallutik.

”Pingaarutilerujussuuvoq PI/SPS-mi isumanginninnermik ilinniartitaanerit iluanni ilinniartitaanerit taaneqartut ingerlanneqartalernissaasa nukittorsaaqataanissaat. Aammattaq amerlanerusunik socialrådgiveritut ilinniartoqalernissamut naammassisoqartalernissaanillu siunissami aqqutissiueqataasinnaanerat neriunaateqarpoq,”
taamatut oqaaseqarpoq Ilinniartitaanermut, Kultureqarnermut Ilageeqarnermullu Naalakkersuisoq Katti Frederiksen.

Ilinniarfissat taakku marluk kommunini sulisunik 40-t tikillugit ilinniartuuteqarsinnaassapput. Ilinniarfissat inuussutissarsiornermi ilinniakkatut (EUD) aamma ingerlaqqittumik ilinniakkatut (AUD) neqeroorutigineqassapput, taamaaliornikkut sullissisut ilinniagaqarsimanngitsut ilinniarnissamut nutaamik periarfissaqalissallutik, sullissisullu inuussutissarsiummik ilinniagallit ingerlaqqittumik ilinniagaqarsinnaalissallutik.

Attavissaq
Ilinniartitaaneq pillugu sukumiinerusumik paasisaqarusuttut attavissaat: pisortap tullia-ilinniartitaanermut pisortaq Marianne Nissen PI/ SPS e-mail: marianne@pi.sps.gl imaluunniit oqa. + 299 38 35 50

Isumaginninnermi iliuuserineqartut pillugit sukumiinerusumik paasisaqarusuttut attavissaat: Naalakkersuisumut allatsi Inger Heilmann Larsen, e-mail: ihla@nanoq.gl imaluunniit oqa. + 299 55 41 60