Ilinniartitaanermut Pilersaarut II 2020

Ilinniartitaanermut Pilersaarut II 2020 maannakkut tamanut saqqummiunneqarluni Naalakkersuisut nittartagaanniilerpoq

Pitsaasumik ineriartornerit Ilinniartitaanermut Pilersaarut I 2005-imeersumit ineriartortinneqarsimasut nangillugit Ilinniartitaanermut Pilersaarut II-mi suliniutit allaaserineqarput. Taamaattumik Ilinniartitaanermut Pilersaarut II pilersaarummut siuliminut taartaanngilaq, suliniutinilli nangitsinikkut ineriartortinneqarsimalluni misilittagarineqalersut iluaqutiginerisigit. Taamaaliornikkut ilinniartitaanitta ataqatigiittuarnissaa aamma ineriartortuarnissaa qulakkeerneqarpoq – maannakkut siunissamilu atuartunut ilinniartuujumaartussanullu iluaqutaasumik.

Ataatsimut anguniagaraarput meeqqanit atualinngitsunit universitetimi ilinniartitaanernut ilinniartitaanerup tamarmi pitsaasuunissaa. Ilinniartitaanermut Pilersaarut II-mi anguniakkat angulertorneqarnissaat suliniutit aqqutissiuutissavaat.

”Ilinniartitaanermut Pilersaarut naalakkersuinermik suliaqartunuinnaq ilinniartitaanermillu suliaqartunuinnaq sakkussiaanngilaq. Aamma ilinniartitaanerup ingerlaavartumik ineriartorneranik innuttaasut tamarmik sukumiisumik paasisaqarnissaannut sakkussatsialaavoq. Taamaaliornikkut siunissami ilinniartitaanermi suliniutinut amerlanerusut tunngavissaqarluartumik oqaloqataanissaannut tunngavissaalluarpoq. Tamassi atuarluarnissassinnik kissaappassi.” Taamatut oqaaseqarpoq Ilinniartitaanermut, Kultureqarnermut Ilageeqarnermullu Naalakkersuisoq, Karl Frederik Danielsen.

Paasisaqarnerorusukkuit attavigisinnaavat naalakkersuisup allattaa, Rosa Thorsen, uani: rosath@nanoq.gl