Qeqertarsuup Tunuani umiatsiaararsortut qaleralittassaat ilaneqarput

Naalakkersuisut novembarip 4-anni 2020-mi aalajangerpaat Qeqertarsuup Tunuani sinerissap qanittuani umiatsiaararsortut qaleralittassaat 1.145 tonsinik ilaneqassasut, taamaalilluni Qeqertarsuup Tunuani umiatsiararsortunut qaleralittassiissutigineqartut 4.968 tonsiulerput.

Taamaalilluni Qeqertarsuup Tunuani aalisariutinut umiatsiaaqqanullu 2020-mi qaleralittassanut TAC-iusoq, akuerisaasumik qaleralittassiissutigineqartut, 9.325 tonsiulerpoq. Qeqertarsuup Tunuanut ilisimatuussuseq tunngavigalugu qaleralittassiissutigineqartut 5.120 tonsiupput.

Qaleralittassiissutigineqartut umiatsiaararsortuinnaq pisassiissutaapput, Qeqertarsuullu Tunuani ukioq manna TAC tunngavigalugu pisassiissutaasunit aalisarneqartut, Qeqertarsuup Tunuani umiatsiaararsortut aalisarsimasaattut pineqassapput.

Umiatsiaararsortut sinerissap qanittuani qaleralinniarneq pillugu Namminersorlutik Oqartussat nalunaarutaat normu 1. 11, 28. aggusti 2014-imeersoq naapertorlugu qalerallit ilassutigineqartut qassutinik aalisassanngilaat.

Naalakkersuisut aamma aalajangerput Namminersorlutik Oqartussani suleqatigiissitamik pilersitsisoqassasoq, suleqatigiissitap ukiup naalernerata qaammataani pisassaaqqittarneq pinaveersaartinniarlugu ingerlatsinikkut aaqqiissutaasinnaasunik periarfissarsiuissaaq.

Erngertumik aalisartoqalersinnaassaaq, aalisarnerlu unitsinneqassaaq ukiumut pisassiissutigineqartut nungunneqarpata.

Paasissutissanik suli allanik, uani taaneqanngitsunik pissarserusukkaanni Aalisarnermut, Piniarnermut Nunalerinermullu Naalakkersuisoqarfimmut saaffiginnittoqarsinnaavoq, e-mail: apnn@nanoq.gl

Sukumiinerusumik paasisaqarusukkaanni Aalisarnermut, Piniarnermut Nunalerinermullu Naalakkersuisoqarfimmi pisortaaneq Jørgen Isak Olsen attavigineqarsinnaavoq. E-mail: jio@nanoq.gl