Kalaallit Nunaat FN-imi imermut oqimaaluttamut isumaqatigiissummut ilaalerpoq

Inatsisartut ataatsimoortut Naalakkersuisut aalajangiiffigisassatut siunnersuutaanut, Kalaallit Nunaata FN-imi imermut oqimaaluttamut isumaqatigiissummut ilaalerneranik kinguneqartussaq akuersissutigeqqammerpaat. Kalaallit Nunaat imermut oqimaaluttamut ilaalernermini uumassusilinnik tikiussisarnerup annikillisarnissaanut pingaarutilimmik alloriaqqittussanngorpoq. Alloriarneq taanna nunatsinni uumassusillit assigiinngissitaarnerinut aalisarnermullu iluaqutaasussaavoq.

Uumassusillit tikiussat takorloorneqarsinnaanngitsumik avatangiisinut allannguisinnaapput
Ukiut tamaasa nunarsuarmi immamit ataatsimiit immamut allamut imeq tonsinik milliardinik arlalinnik annertussuseqartoq nuunneqartarpoq. Umiarsuit nunarsuarmi imartani angallannerini, aammalu umiarsuit itsinerminnik makittarissutsiminnillu iluarsiiniarlutik tankerujussuarminnut imermik oqimaaluttamik ikisisarnerini kuutsitsisarnerinilu tamanna pisarpoq. Imermik oqimaaluttamik, uumassusilinnik tikiussanik imaqarsinnaasunik kuutsitsisarnermi avatangiisit annertoorujussuarmik akiliisarput. Nunarsuarmi uumassusillit tikiussat ajornartorsiutaaneri annertusiartorpoq, aammalu uumassusillit assigiinngissitaarnerinut aalisarnermullu sunniuteqartorujussuusarlutik.

Naalakkersuisoq Jess Svane Imermut Oqimaaluttamut Isumaqatigiissummut ilaalernermut atatillugu oqarpoq:

”- Maannarpiaq uumassusillit imartatsinnut tikiunneqarsimasut ikipput, kisiannili silap pissusiata allanngoriartorneri aammalu Issittumi umiarsuit angalasartut amerliartorneri ilutigalugit uumassusilinnik tikiussisarnerup annertusinissaanut ulorianartorsiorneq annertusiartorpoq. Imermut oqimaaluttamut isumaqatigiissummut ilaalernitsigut akisussaassuseqarnerput takutipparput, aammalu Kalaallit Nunaat nunatut siunissamut isigisuusoq piujuartitsiumillu atuiffiulluni uumassusillit pigisatta assigiinngissitaarnerinut aalisarnermullu illersuiffiusoq ersarissarlutigu.”

Naalakkersuisut inatsimmi atuutsinneqareersumi siulliupput
Kalaallit Nunaat ilaalernissaq sioqqullugu Imermut Oqimaaluttamut Isumaqatigiissummi maleruagassanik naammassinnereerpoq. Tassalu imartami avatangiisinut illersuinissamut Inatsisartut inatsisaat 2017-imeersoq kapitalimik, imermut oqimaaluttamut tunngasumik imaqarpoq. Tamanna pissutigalugu Naalakkersuisut isumaqatigiissummut ilaalernissaq sioqqullugu inatsisitigut atuutsitsereerput, tamatumattaarlu kingunerisaanik nunatsinni inuussutissarsiortut naleqqussaareerput aammalu isumaqatigiissummi piumasaqaatinik malinnereerlutik.

”- Naalakkersuisut Imermut Oqimaaluttamut Isumaqatigiissummut ilaalernissaq sioqqullugu, uumassusilinnik tikiussisarnermik pinngitsoortitsiniarlutik inatsisitigut pingaarutilimmik alloriarsimapput. Ilaalernitsigut najukkani imartani avatangiisitta, uumassusillit assigiinngissitaarnerisa, aalisarnerup pinngortitamilu isumalluutitta annertuumik ajoquserneqarsinnaanerinut pingaarutilimmik alloriaqqippugut”, Naalakkersuisoq Jess Svane naggasiivoq.

Annertunerusumik paasisaqarusunnermi Naalakkersuisoqarfimmi pisortaaneq Mette Skarregaard Pedersen tlf.: 346476-imut imaluunniit e-mail: mesp@nanoq.gl aqqutigalugu attaveqarfigineqassaaq

Paasissutissat: Uumassusillit tikiussat
Uumassusillit tikiussat tassaapput uumassusillit, nunap imartaani angerlarsimaffeqanngitsut. Uumassusillit tikiussat nunarsuaq tamakkerlugu ajornartorsiutaanerat annertusiartorpoq. Uumassusillit assigiinngissitaarnerinut aalisarnermullu sunniuteqarnerlorujussuarsinnaapput.