Pimoorussillunga sulivunga

Inuit Ataqatigiit Inatsisartuni ilaasortaatitaat Aqqaluaq B. Egede IA-p nittartagaani allappoq aqutsiveqarfinni Qeqertarsuup Tunuani Uummannamilu qaleralittassiissutigineqartut nungummata Naalakkersuisoqarfinni atorfilittama tunuannut toqqorterlunga Naalakkersuisutut sulisunga. Taama oqarnini nammineerluni akisussaaffigissavaa.

Aqutsiveqarfinni Uummannami aamma Qeqertarsuup Tunuani qaleralinniarneq suli unitsinneqanngitsoq Naalakkersuisoqarfimmi Naalakkersuisut ataatsimiinnissaannut isummernissamut tunngavissiamik Naalakkersuisunut saqqummiussassamik suliaqartoqarpoq. Tunngavissiap suliarineqarnerata nalaani novembarimut decembarimullu qaleralittassaqarpoq, taakku oktobarimi qaleralinniarnermut sippuisoqassappat matussusiisinnaallutik.

Qaleralinniarnerli sakkortuseriarmat novembarimut decembarimullu qaleralittassiissutigineqartut tamakkerneqalersimapput, qaleralinniarneq ippassaq unitsinneqartariaqalerluni.

Isertuanani oqaatigisariaqartoq tassaavoq qaleralinniarneq pillugu tamaviaarussisoqarluinnartariaqarmat. Ukiakkut ukiorlu naaleraangat qaleralittassiissutigineqartut ukiuni kingullerni ukiut tamaasa nunguttarput. Tamatumunnga pissutaavoq ukiut tamaasa pingaartumillu ukiup naalerani, aalisarnerup ukiup ingerlanerani ineriartornera malillugu tamatigut pisassiissutinik amigaateqalertarneq. Politikeritut sulininni nunatsinni aalisarneq tamaat ataatsimut isigalugu suliniartuuvunga, aamma Naalakkersuisoqatigiinnissamut isumaqatigiissutigineqartut tunngavigalugit sullissiniartuullunga.

Maannakkut qaleralinniarnermi pissutsit avaqqunneqarsinnaanngitsut tassaapput qaleralinniarsinnaasut qaleralittassiissutigineqartunut sanilliullugit aalisarsinnaassusermut annertuallaarmat. Taama aaqqissuussisimaneq allanngortinneqanngippat taama pisoqartuassaaq. Naalakkersuisoqarfimmi aaqqiissutissamik maannakkut suliaqarpugut. Qeqertarsuup Tunuani qaleralinniarnerup piaartumik aallarteqqinnissaa salliutillugulu pingaartinneqarpoq. Taannaavorlu aaqqiissutissarsiorlugu maannakkut suliara.

Inussiarnersumik inuulluaqqusillunga

Jens Immanuelsen
Aalisarnermut, Piniarnermut Nunalerinermullu Naalakkersuisoq

Attavigineqarsinnaasoq: Aalisarnermut, Piniarnermut Nunalerinermullu Naalakkersuisoqarfik. E-mail: APNN@nanoq.gl