Angalallutik katsorsaasartut suliaat iluatsilluartut

Angalallutik katsorsaasartut suliaat pillugit misilittakkanik eqikkaanermi suliniarnerup siunertamut naapertuussimanera takutinneqarpoq, kiisalu meeraanerup nalaani kinguaassiuutitigut atornerlunneqarnermut katsorsaanermik suliniarnermi maannamut inersimasut 654-t kingunerlutsitsisarnerminni ikiorserneqarsimasut.

Meeraanerup nalaani kinguaassiuutitigut atornerlunneqartarnerup kingunerisaanik inersimasut kingunerlutsitsisarneranni katsorsaariaaseq 2013-imi Naalakkersuisunit pilersinneqarpoq. Angalallutik Katsorsaasartut sulinerat pillugu misilittakkanik maanna eqikkaasoqarsimalerpoq, tassanilu suliniut pillugu killiffik takutinneqarpoq, suliallu ingerlaqqinnissaanut inassuteqartoqarluni.

Illoqarfiit nunaqarfiillu 13-t maannamut Angalallutik Katsorsaasartunit tikeraarneqarsimalereerput. Misilittakkanik eqikkaanerit ilaatigut sullitanit tarnillu nakorsaanit oqariartuutinik tunngaveqartut takutippaat, Angalallutik Katsorsaalluni suliniarneq pingaarnertut anguniakkat tunngavigalugit sunniuteqarluartutut isikkoqartoq:

"Katsorsaanerup (__) kinguneraa inuuninni aatsaat siullerpaamik imminut naleqarnera, imminut tatiginera aamma qamuuna nuannaarnera misigisimalersimagakku. Allatulli naleqartigisutut misigisimalernikuuvunga, aamma ataatama iliuusiinut akisussaananga misigisimalernikuullunga" - Angalasartunit sullitaq oqarpoq.

“Atornerlunneqartarnerma kingorna ilinniagaqalernissannik qununera kingunerlutsitsinernut ilaasimavoq. Katsorsartereernerma kingorna inersimasutut ilinniagaqarnissara qunugiunnaarsimavara, tamannami siunissannut atatillugu sinnattorisarsimavara" – Angalallutik Katsorsaasartuni sullitaq oqarpoq.

”Qitornannut [katsorsartinnikuunera] iluaqutaasorujussuusimavoq. Allanit killissamik qaangiiffigitinnginnissaat ilinniartinniarsarisimavakka. Meeqqat pisinnaatitaaffii pillugit aamma atuffattarpakka” – Angalallutik Katsorsaasartuni sullitaq oqarpoq.

”Aappariittut pitsaanerungaartumik atugaqalersimanertik sullitatta aappaqartut oqaatigisarpaat. Oqaloqatigiilluarsinnaalersimapput pitsaanerusumillu inooqatigiilerlutik. Aappariinnermi ajornartorsiutigisimasatik imminut qiviartarnermik nalikinnerullunilu misigisimanermik tunngaveqarsimasut amerlasuut takusinnaalersimavaat. Aamma kingunerlutsitsinerit ulluinnarni uippallernermik pilersitsisarput, tamannalu ulluinnarni ajornartorsiutinik inooqatigiinnermullu ajoqutaasunik pilersitsisarpoq” – Angalallutik Katsorsaasartuni tarnip pissusaanik ilisimasalik oqarpoq.

Misilittakkanik eqikkaaneq aamma siunissami Angalallutik Katsorsaasartut sulinissaannut inassutinik arlalinnik kinguneqarsimavoq. Tamatuma saniatigut kaammattuutigineqarpoq:
  • Paasisanik katersinerup aaqqissuunneqarneranik pitsanngorsaanissaq
  • Najukkami suliassaqarfinni arlaqartuni suleqatigiinnerup annertusarnissaa
  • Malitseqartitsilluni suliaqarnerup isumannaarnissaa
  • Inunnut kinguaassiuutitigut kannguttaatsuliornermik pissusilersortartunut katsorsaasarnissamut neqeroorutip isumannaarnissaa
  • Qanigisaasunut iliuuseqartarnerup annertusarnissaa
Misilittakkanik eqikkaaneq tamaat uani atuaruk.

Angalallutik Katsorsaasartut pillugit:
Angalallutik Katsorsaasartut Innuttaasut tunaartaralugit immikkoortortaavoq, Isumaginninnermut Aqutsisoqarfimmi.

Angalallutik Katsorsaanermik suliaqarnerani pingaarnertut anguniakkat sisamaasut tassaapput:
  • Meeraanerup nalaani kinguaassiuutitigut atornerlunneqartarnerup kingunerisaanik inersimasut kingunerlutsitsisartut pitsaanerusumik inuuneqarnissaannut pitsaanermik tunngavissiinissaq.
  • Piffissap ingerlanerani inersimasut kingunerlutsitsisartut suliffeqarnermut piareersimanerulernissaannik ilapittuuteqarnissaq.
  • Inuit kingunerlutsitsisut ilaqutariinni inuunerisa nukittorsarnissaa.
  • Inuit kingunerlutsitsisartut meeraasa kinguaassiuutitigut atornerlunneqarnissaannik allatigulluunniit sumiginnarneqarnissaannik aarleqquteqarsinnaanerisa annikillisarnissaat.
Paasissutissiinerunissamut attavigiuk: Paarisa-mi immikkut ilisimasalik Maliina Junge Jørgensen e-mail majj@nanoq.gl iml. oq. 346022