Pituffimmi Kiffartuussinermut isumaqatigiissummut isumaqatigiinninniarnerit naammassipput

Naalakkersuisut Siulittaasuannit Kim Kielsen-imit amerikarmiullu ambassadøriannit Carla Sands-imiit atsiorneqartoq Kalaallit Nunaata USA-llu akunnerminni ataatsimoortumik pilersaarummik isumaqatigiissuteqarneq.
Nunanut allanut ministeri Jeppe Kofod, Nunanut allanut Nukissiuteqarnermullu Naalakkersuisup Pituffimmi kiffartuussinissamut isumaqatigiissut pillugu isumaqatigiinninniarnerit maannakkorpiaq naammassivaat. Isumaqatigiissut kalaalliniit annerusumik sunniuteqarfigineqarsimasoq, kalaallinullu iluaqutaasussaq.



Pingasunngornermi 28. Oktober qaffasissumik ataatsimeeqatigiinnermi isumaqatigiissutigineqarput allakkat uppernarsaatit sisamaasut, taakku katillutik USA-p Danmarkip Kalaallillu Nunaata Thulebase-mi(Pituffimmi) kiffartuussinermi isumaqatigiissutinut ukiorpanngortuni isumaqatigiinninniarneranni inernerusut. Allagakkat uppernarsaatit ilaat ataaseq Nunat marluk, Kalaallit Nunaata USA-llu akornanni suleqatigiinnerup ingerlariaqqinnissaanik pilersaarut atsiornertalik isumaqatigiissutaavoq.

Naalakkersuisut Siulittaasoq Kim Kielsen oqaaseqarpoq:

“USA-mik Nunat marluk akunnerminni ataatsimoortumik pilersaarut pilersaarummik isumaqatigiissuteqarnerput iluarisimaartorujussuuarput. Naalakkersuisuniit, Inatsisartunit inuiaallu kalaallit tungaanniit amerikarmiut nunatsinniinnerata piviusumik, tigussaasumillu iluaqutaanissaa pingaartissimasorujussuuarput.”


Nunanut allanut Nukissiuteqarnermullu Naalakkersuisoq Steen Lynge oqarpoq:

”Suliaq tunngaviusumik annertoorujummik Kalaallit Nunaannut isumaqaqaaq, tassami uaguuvugut amerikarmiut sakkutooqarfianik nunamiititsisut, tulluusimaarutigivarpullu Pituffiup Kalaallillu Nunaata Amerikap isumannaatsuunissaata saniatigut Kalaallit atlantikorlu ikaarlugu isumannaatsuunissamut qitiusumik inissisimanitta akuerineqarnera.”

Suliariumannittussarsiornermi piumasaqaatit nutaat, Pituffimmi kiffartuussinissamik isumaqatigiissutissani nutaassani kalaallit suliffeqarfiutaannut iluaqutaassapput. Siunertarineqarpormi, amerikarmiut nunatsinniinnerata siammasissumik annertunerpaamillu Kalaallit Nunaannut iluaqutaanissaa. Soorlu amerlanerusunik ilinniartoqarnissamut, suliffissaqartitsisinnaanermut periarfissanik aammalu akileraarutitigut isertitassatigut.

Nunanut allanut ministeri Jeppe Kofod oqaaseqarpoq:

”Suliariumannittussarsiornermi piumasaqaataasussat nutaat isumaqatigiissutigineqarneri iluarisimaaqaara. Isertorneqarsinnaanngilarlu aqqut takisimallunilu ajornakusoorsimasoq, tulluusimaarutigalugulu nuannaartutingaara angusarissatta, Kalaallit Nunaannut kalaallillu suliffeqarfiinut iluaqutaassammat. Matumalu takutippaa USA-mik suleqatigiinnitta nukittuneranik – kiisalu suleqatigiinnitsigut ajornartorsiutinik ajornakusoorsinnaaqisunik qaangiisinnaanitsinnik.”

Kiffartuussinermik isumaqatigiissummik suliap – aserfallattaaliineq, sanaartorneq kantiinamillu ingerlatsinerup il.il, tunuliaqutigaa 2014-mi USA-p kiffartuussineq amerikarmiut suliffeqarfianut tunniummagu. Tamanna sioqqullugu isumaqatigiissut ukiorpassuarni Kalaallit-qallunaat suliffeqaffiutaasa tigummisimavaat. Tunniussinerlu Kunngeqarfiup Danmarkip paasinnittaasia malillugu Kunngeqarfiup USA-llu akunnerminni isumaqatigiissutaannut atuuttunut akerliusimavoq; illersornissap isumaqatigiissutaata katitigaaneranik taaneqartumi. 2014-miilli Kunngeqarfiup USA-lu isumaqatigiinninniarsimapput, suliariumannittussarsiuussisarnermi piumasaqaataasussanik, angorusullugu suliariumannittussarsiornissami tullermi Kalaallit/qallunaat suliffeqarfiutaannut isumaqatigiissusiortoqarnissaanik.

Ullumikkut qaffasissumik ataatsiinnermi amerikarmiuniit nunami sillimaniarnermut siunnersorti Robert C. O´Brian, Kunngeqarfimmi Danmarkimi amerikap ambassadøria Carla Sands peqataapput. Qallunaat tungaanniit peqataavoq nunanut allanut ministeri Jeppe Kofod. Kalaallit tungaanniit Naalakkersuisut Siulittaasuat Kim Kielsen aamma Nunanut allanut Nukissiuteqarnermullu Naalakkersuisoq Steen Lynge. Ataatsimiinnermi Kielsen Sands-ilu Kalaallit Nunaata USA-llu akunnerani suliassaqarfinnik arlalinnik tiguneqareersimasuni suleqatigiinnerup ingerlariaqqinnissaannut akunnerminni ataatsimoortumik pilersaarutit isumaqatigiissutaannik atsiorput.

Allakkat uppernarsaatit isumaqatigiissummiittut uani link-imi tikinneqarsinnaapput.

Paasissutissanik amerlanerusunik perusukkuit:

Nunanut allanut naalakkersuisoqarfimmi pisortaq: Kenneth Høegh, +299 56 56 04
Udenrigsministeriami: Pressechef Oliver Routhe Skov, +45 30541227